இடம் மாறுகிறது இனயம் துறைமுகம்

இடம் மாறுகிறது இனயம் துறைமுகம்? ஆய்வு படகை சிறை பிடித்து போராட்டம்

நாகர்கோவில், இனயம் சர்வதேச பெட்டக துறைமுகம் எதிர்ப்பு காரணமாக வேறு இடத்துக்கு மாறும் என்று கூறப்பட்டு வந்த நிலையில் கன்னியாகுமரி அருகே ஆய்வு பணி தொடங்கியுள்ளது.
இதற்காக வந்த ஆய்வு படகை மீனவர்கள் சிறை பிடித்து போராட்டத்தில் ஈடுபட்டனர்.கன்னியாகுமரி மாவட்டம் இனயத்தில் சர்வதேச பெட்ட துறைமுகம் அமைக்க ஆய்வு பணி நடைபெற்று வந்தது. இதற்காக கருங்கல் அருகே அலுவலகம் திறக்கப்பட்டது. ஆனால் இதற்கு அப்பகுதி மக்கள் கடுமையான எதிர்ப்பு தெரிவித்து பல்வேறு கட்ட போராட்டம் நடத்தினர்.
சமீபத்தில் பேட்டியளித்த அமைச்சர் பொன் ராதாகிருஷ்ணன், 10 ஆண்டுகள் கழித்து தங்கள் பகுதியில் துறைமுகம் வரவில்லையே என்று இனயம் மக்கள் கவலைப்படுவார்கள் என்று கூறினார். இதனால் இனயம் பெட்டக துறைமுகம் இடம் மாறும் என்று கூறப்பட்டு வந்தது.
மாற்றம் பற்றி அதிகார பூர்வ தகவல் எதுவும் வெளிவராத நிலையில் நேற்று ஒரு படகு கோவளம் துவாரகபுரி பகுதியில் ஆய்வு பணியில் ஈடுபடுவதை இப்பகுதி மீனவர்கள் பார்த்தனர்.
கரையில் ஏராளமான மக்கள் கூடியதால் போலீசார் சமரசம் செய்தனர். இந்நிலையில் சில மீனவர்கள் தங்கள் படகுகளில் கடலுக்குள் சென்று அந்த படகை சுற்றி வளைத்து திரும்பி செல்லும் படி போராட்டத்தில் ஈடுபட்டனர்.