உலகையே தெறிக்க விட்ட ஸ்டார்ட்அப்... ஜாக்பாட் அடிச்ச கூகுள்! #StartUpBasics

அது உலகை உள்ளங்கையில் ஆட்டிப் படைத்து வருகிறது. அதை நீங்களும் நானும் கூட உபயோகிக்கிறோம். கோடி ரூபாய் பெறுமானமுள்ள தொழில்நுட்ப பொருட்களை அது இலவசமாக கொடுத்து வருகிறது. டெர்மினேட்டர் திரைப்படத்தில் வரும் ஜெனிசிஸ் போல எங்கும் வியாபித்து இருக்கும். இப்போது கண்டுபிடித்திருப்பீர்கள். ஆம் ஆண்ட்ராய்டு மொபைல் செயலி தான் அது. ஆண்ட்ராய்டு என்ற அந்த ஒரு ஸ்டார்ட்அப் பல லட்சக்கணக்கான ஸ்டார்ட்அப் உருவாக காரணமாகி இருக்கிறது. அது தான் சிறப்பிலும் மிகச் சிறப்பு என்பேன்.

சாம்சங், விவோ, ரெட்மீ ஓனர்களே... ஒரு நல்ல ஸ்மார்ட்போனில் நாங்கள் எதிர்பார்ப்பது இவைதாம்!

ஆண்டிரூபின் என்ற ரோபாட்டிக் எஞ்சினியரின் அறிவுக்குழந்தை தான் ஆண்ட்ராய்டு. அவர் ஆப்பிள் உட்பட பல உயர்தொழில்நுட்ப எலெக்ட்ரானிக் நிறுவனங்களில் வேலை பார்த்தார். அதில் கிடைத்த அனுபவத்தில் நண்பர்களுடன் டேஞ்சர் என்ற மொபைல் டிவைஸ் ஸ்டார்ட்அப்பை 1999இல் துவக்குகிறார். டேஞ்சர் என்ற பெயரே பயங்கர அதிரடியாக இருக்கிறதல்லவா? அவர்களின் தயாரிப்புகளின் அதிரடி தான் Touch Screen உடன் கூடிய Qwerty கீபோர்ட், Side-Flip மாடல் (பார்ப்பதற்கு பழைய நோக்கியா Communicator போல இருந்தது). அவர்களது போன்கள் பல புதிய பயன்பாடுகளுடன் மிகக் குறைந்த விலையில், குறிப்பாக ப்ளாக்பெர்ரியை தோற்கடிக்க பிறந்த மாடல் போல வந்தது. ஆனால் நான்கு வருடத்திற்குள் சக பார்ட்னர்களுடன் கருத்துவேறுபாடு காரணமாக 2003இல் வெளியேறுகிறார் ஆண்டிருபின். ( 2008இல் டேஞ்சர் மைக்ரோசாப்டை ஈர்க்க, உடனே ஒரு விலை பேசி பேரத்தை முடித்துவிடுகிறார்கள் என்பதும் பின்னர் மைக்ரோசாப்ட் டேஞ்சரின் சிலபல உரிமைகளை Xiomiக்கு விற்றுவிட்டு மூடிவிட்டது என்பதும் தனிக்கதை )

டேஞ்சர் நிறுவனத்தில் வெளியில் வந்தவர் தன் பெயரில் கொஞ்சம் எடுத்து ஆண்ட்ராய்டு என்ற மொபைல் செயலி நிறுவனத்தை துவக்குகிறார். ரிச்மைனர், க்றிஸ் ஒயிட், நிக் சியர்ஸ் என்ற மூன்று எஞ்சினியர்களுடன் இணைந்து நிறுவனத்தை வளர்த்து எடுக்கிறார். ஆரம்பத்தில் இது டிஜிட்டல் கேமராக்களுக்கு செயலிகள் எழுதும் நிறுவனமாகத்தான் இருந்தது. ஆனால் அதில் பெரிய சந்தை இல்லை உணர்ந்த இவர்கள், பொதுமக்கள் அனைவருக்குமான மொபைல் சந்தைக்கு தேவையான செயலியை உருவாக்குகிறார்கள்.

ஆண்ட்ராய்டின் பெயர் அப்போது அவ்வளவாக வெளியில் தெரியவில்லை. மொபைல் டிவைசிற்கு தேவையான சாஃப்ட்வேரை தான் தயாரிக்கிறார்கள். செயலி(Operating System) தயாரித்து கொண்டிருப்பது ரகசியமாக வைக்கப்பட்டிருந்தது நீண்டகாலத் தயாரிப்புகள் அவை. உடனடி லாபம் ஈட்டக்கூடிய கண்டுபிடுப்புகள் அல்ல. ஹார்ட்வேர், சாஃப்ட்வேர் இரண்டு இணைந்த தயாரிப்பு வேறு. அதனால் நிறைய செலவு இருந்தது.

ரூபின் இந்த ஸ்டார்ட்அப் தொடங்குவதற்கு முன்வரை பல பெரிய நிறுவனங்களில் கைநிறைய சம்பளத்துடன் வசதியுடன் வாழ்ந்தவர் தாம். இதை தொடங்க பலமுறை முயற்சித்து தள்ளிப்போட்டு டேஞ்சர் என்ற நிறுவனத்தை நண்பர்களுடன் துவங்கி அதில் அவரது கனவை நிறைவேற்ற முடியாமல் தான் ஆண்ட்ராய்டை துவங்கினார். மிகக்கடுமையான போராட்டத்தில் முக்கால் கடலைத் தாண்டி விட்டார். இன்னும் கொஞ்ச நாளில் அவரது கனவுகுழந்தை பிறந்துவிடும். ஆனால் கையில் பணம் சுத்தமாக இல்லை. வங்கி இருப்பு, கிரெடிட்கார்ட் எல்லாம் மைனசில் இருக்கிறது. அந்த சமயம் இவர்களின் நிர்வாகத்திற்கு தேவையான நிதி இல்லை. சரியான சமயத்தில் நண்பர் வெறும் 10000 டாலர்களை எந்தவித எதிர்பார்ப்பின்றி கொடுத்து உதவுகிறார். நிறுவனம் இன்னும் கொஞ்சம் தாக்குப்பிடிக்கிறது.

இது தான் ஸ்டார்ட்அப்பின் சிக்கலான கட்டம். பூஜ்ஜியத்திற்கும் ஒன்றிற்கும் உள்ள தூரம் தான் அதிகம். ஒன்றில் இருந்து நூறை அடைவது சுலபமே. ஒவ்வொரு ஸ்டார்ட்அப் கதையிலும் ஒரு கடும்நெருக்கடி காலத்தை பார்க்கலாம். அந்த நெருக்கடி காலத்தை கடந்தவர்கள் தான் வெற்றியை தொடுகிறார்கள்.

காலத்திற்கு இவரின் போராட்டம் புரிந்ததோ என்னவோ அந்த அதிசியம் நிகழ்ந்தது. Google நிறுவனம் இவர்களைப் பற்றி அறிந்து பேச்சுவார்த்தைகள் நடத்துகிறார்கள். அவர்களுக்கு ஓரளவுக்கு தெரிகிறது எதிர்காலத்தில் ஆண்ட்ராய்டின் தேவை என்ன என்பது. நிறுவனத்தை வாங்க முயற்சிக்கிறார்கள். நிறுவனம் வளரும் ஆரம்பகட்டத்திலேயே விலைக்கு கேட்டதால் மிகக் குறைந்த விலைக்கு ஆண்ட்ராய்டு கூகிளுடன் இணைகிறது. அதன் ஒரு பகுதியாக ஆண்டிரூபின் மற்றும் இதர வல்லுனர்களும் கூகிளில் இணைந்தார்கள். வெறும் 50 மில்லியன் டாலர்களுக்கு வாங்கப்பட்ட இந்த நிறுவனம் தான் ஒட்டுமொத்த ஸ்மார்ட்போன் மார்கெட்டையும் அள்ளிக்கொண்டு போகப் போகிறது என கூகுள் கூட நினைத்துப்பார்த்திருக்குமா தெரியவில்லை. இன்று ஆண்ட்ராய்டு மதிப்பு மட்டும் மூன்று லட்சம் கோடி ரூபாய்களை தாண்டும் என்று கணக்கிடுகிறார்கள். ஆகவே தான் ஸ்டார்ட்அப் உலக வல்லுனர்கள் இதை உலகின் மிகச்சிறந்த கையகப்படுத்துதல்(acquisition) என்று வர்ணிக்கிறார்கள்.

உலகின் மொத்த ஸ்மார்ட்போன் சந்தையில் 83% ஆண்ட்ராய்டு மட்டுமே. 140 கோடி மக்கள் இதை உபயோக்கிறார்கள். கூகுளின் மொத்த வருமானத்தில் 60% க்கும் அதிகமாக இதன் மூலம் தான் வருகிறது. இன்னும் இது அள்ள அள்ள குறையாத அமுதசுரபியாக கொடுத்துக்கொண்டே இருக்கிறது.

Software as a Platform (SaaP) வகைக்கு இது ஒரு சிறந்த உதாரணம். இவர்கள் இதை ஒப்பன் சோர்ஸ் ஆக எல்லா மொபைல் நிறுவனங்களுக்கும் திறந்துவிட்டார்கள். இதனால் இது பல நிறுவனங்களால் பலவாறாக மெருகூட்டபட்டு, குறைந்த விலையில் ஸ்மார்ட்போன்கள் பெருவாரியான சந்தையை அடைந்தது. அது இன்டர்நெட் பயன்பாட்டின் பெரும்பகுதியை மொபைலுக்கு மாற்றியது

மொபைல் சந்தையில் மிகப்பெரிய வெற்றியை பெற்ற Nokia, Motorolla போன்ற பெரிய மொபைல் நிறுவனங்களின் வீழ்ச்சிக்கும், சாம்சங், ஜையோமி, மைக்ரோமாக்ஸ் போன்ற எண்ணற்ற ஆசிய நிறுவனங்கள் பெரும் வளர்ச்சி பெறவும் காரணம் ஆண்ட்ராய்டின் வருகை தான். இன்று மோனோபாலி தொழில்நுட்பம் கொண்ட ஆப்பிள் போனின் சந்தையையும் கபளீகரம் செய்துவருகிறது.

ஆண்டிரூபின் அன்று நெருக்கடியான காலகட்டத்தில் தாக்குபிடிக்காமல் போயிருந்தால் சாமானியர்களின் கையில் ஸ்மார்ட்போன்களின் தொழில்நுட்பம் சென்று சேர்ந்திருக்குமா என்பதும் அதன் பயனாக உருவாகிய எண்ணற்ற ஸ்டார்ட்அப் நிறுவனங்கள் உருவாகியிருக்குமா என்பதும் சந்தேகமே


ஸ்டார்ட்அப் பாடம்

சுடச்சுடரும் பொன்போல் ஒளிவிடும் துன்பஞ்

சுடச்சுட நோற்கிற் பவர்க்கு.

என்பார் வள்ளுவர். தம்மைத் தாமே வருத்திக் கொண்டு ஒரு குறிக்கோளுக்காக மனம் தளராமல் கடும்விரதம் இருப்பவர்களை எந்தத் துன்பங்கள் தாக்கினாலும் அவர்கள் சுடச்சுட ஒளிவிடும் பொன்னைப் போல் புகழ் பெற்றே உயர்வார்கள்

சுருக்கமா சொல்லணும்னா எவ்வளவு கஷ்டம் வந்தாலும் தாங்கிக் கொண்டு தொடர்ந்து நம்பிக்கையோடு உழைக்கிறவங்க உலகத்தை தெறிக்க விடுவாங்க.. ஆண்டிரூபின் போல.

முழு உடல் பரிசோதனை... யாருக்கு, எப்போது, ஏன் செய்ய வேண்டும்? #HealthAlert

‘லேசாகத் தலைவலிக்கிறது’ என்று சொன்னால்கூட, 'ஃபுல் பாடி செக்கப் பண்ணிக்கோடா' என்று அட்வைஸ் செய்கிறார்கள் நண்பர்கள். அந்த அளவுக்குப் படித்தவர்கள் முதல் பாமரர்கள் வரை எல்லோரின் மூளையிலும் பதிவாகிவிட்ட வார்த்தையாகிவிட்டது 'ஃபுல் பாடி செக்கப்’ என்கிற முழு உடல் பரிசோதனை.

எங்கு பார்த்தாலும் ஹெல்த் செக்கப் விளம்பரங்கள். வீதிகளில் நடந்து செல்லும்போது, "சார் உங்க வெயிட் செக் பண்ணிக்கோங்க" என்று அழைத்து, உங்களைப் பற்றிய விவரங்களை எல்லாம் வாங்கிக்கொண்டு, "கொலஸ்ட்ரால் அதிகமா இருக்கு", "வெயிட் அதிகமா இருக்கு" என்றெல்லாம் சொல்லி பீதியைக் கிளப்பி, "ஃபுல் பாடி செக்கப் பண்ணிக்கோங்க... 15 சதவிகிதத் தள்ளுபடியோடு" என்று ஆசை காட்டுவதும் நடக்கிறது.

"உண்மையில்,  'மாஸ்டர் ஹெல்த் செக்கப்' என்பது ஆரோக்கியமாக இருப்பவர்களையும் நோய் பயம் காட்டி, மருத்துவமனை வாடிக்கையாளராக மாற்றக்கூடிய கார்ப்பரேட் தந்திரம்" என்றும் சிலர் சொல்கிறார்கள். இதைத்தான் சமீபத்தில் வெளிவந்த 'மெர்சல்' படத்திலும் பேசினார்கள்.

இன்னொரு பக்கம், முழு உடல் பரிசோதனை எல்லா இடங்களிலும் ஒரே மாதிரியாக இருந்தாலும், கட்டணங்கள் மட்டும் வெவ்வேறுவிதமாக இருக்கின்றன. அதுமட்டுமல்ல... ஒரு மருத்துவமனையில் எடுத்த பரிசோதனை மற்ற மருத்துவமனையின் சோதனையோடு பொருந்திப்போவதும் இல்லை.

உண்மையில், முழு உடல் பரிசோதனை என்பது என்ன, அது யாருக்கு அவசியம், அதில் செய்யப்படும் பரிசோதனைகள் மூலம் என்னென்ன நோய்களைக் கண்டறிய முடியும்..? பொதுநல மருத்துவர் விஜய சக்கரவர்த்தியிடம் கேட்டோம்...

“நோய்களை முன்னரே கண்டறிவதன் மூலம் உடல்நலனை பாதுகாத்துக்கொள்ளலாம். அந்த வகையில் முழு உடல் பரிசோதனை (Master Health Check-up) அதற்குப் பெரிதும் உதவும். இன்றைய பரபரப்பான வாழ்க்கை முறை காரணமாக, உடல்நலனில் அக்கறை செலுத்த பலருக்கும் நேரமிருப்பதில்லை. `நோய் வந்த பிறகு பார்த்துக்கொள்ளலாம்’ என்ற மனநிலையே இன்றைய தலைமுறையினரிடம் மேலோங்கி நிற்கிறது. இதனால், நோய் அறிகுறிகள் வெளிப்படும் வரை பலரும் கண்டுகொள்வதில்லை. நோய் முற்றிய பின்னர் மருத்துவமனையில் அனுமதிக்கப்பட்டு, பல லட்ச ரூபாய்களை இழந்தும் பலன் கிடைக்காமல் போய்விடவும்  அது காரணமாகிறது. இருந்தாலும், எல்லோரும் இந்த பரிசோதனை செய்து கொண்டுதான் ஆகவேண்டும் என்பதில்லை.

என்னென்ன பரிசோதனைகள்?

கண், பல், காது, மூக்கு, தொண்டைப் பரிசோதனைகள், மார்பக எக்ஸ்-ரே, இ.சி.ஜி ரத்த வகை, ரத்த அழுத்தம், ரத்தச் சர்க்கரை அளவு, ரத்தத்தில் உள்ள கொழுப்பு,  யூரியா, கிரியேட்டினின் போன்ற அளவுகள், வயிற்றில் அல்ட்ரா சவுண்ட் பரிசோதனை, தைராய்டு சுரப்புப் பரிசோதனை, கல்லீரல் மற்றும் சிறுநீரகப் பரிசோதனை போன்ற அடிப்படையான மருத்துவப் பரிசோதனைகள் மேற்கொள்ளப்படும். இந்தப் பரிசோதனைகள் ஒவ்வொரு மருத்துவமனையிலும் வசூலிக்கப்படும் கட்டணத்தைப் பொறுத்து மாறுபாடு இருக்கும்.

யாரெல்லாம் செய்துகொள்ள வேண்டும்?

பொதுவாக, 35 வயதுக்குமேற்பட்டோர் ஆண்டுக்கு ஒரு முறை முழு உடல் பரிசோதனை செய்துகொள்வது நல்லது. குறிப்பாக உயர் ரத்த அழுத்தம், மாரடைப்பு, ரத்தப் புற்றுநோய், சர்க்கரைநோய் போன்ற ஏதாவது மரபு வழி நோய்கள் இருந்தால் அந்தக் குடும்பத்தை சேர்ந்தவர்கள் 35 வயதுக்கு முன்பாக இந்தப் பரிசோதனை செய்துகொள்வது நல்லது.

புகைபிடிப்பவர்கள், மது அருந்துபவர்கள், உடல் பருமனாக உள்ளவர்கள், போதிய உடலுழைப்பு  இல்லாமல் உட்கார்ந்த நிலையிலேயே பணியாற்றுபவர்கள், ஸ்டீராய்டு மருந்துகளைத் தொடர்ந்து சாப்பிடுபவர்கள் போன்றோர் வருடத்துக்கு ஒரு முறை கட்டாயம் இதைச் செய்துகொள்ள வேண்டும்.

நன்மைகள் என்னென்ன?

பல், கண், காது, மூக்கு, தொண்டை போன்ற பல உறுப்புகளில் ஏற்படும் நோய்களை முன்கூட்டியே தெரிந்துகொள்ள முடியும்.

இதயம், சிறுநீரகம், கல்லீரல், மார்பகம், பெண்களுக்கு கர்ப்பப்பை போன்ற உறுப்புகளில் ஏற்பட இருக்கும் நோய்களை இதன்மூலம் கண்டறிய முடியும்.

சர்க்கரைநோயின் ஆரம்ப நிலையில் உள்ளவர்கள், இதன்மூலம் எச்சரிக்கையாக இருந்து, சரியான உணவு முறை மற்றும் உடற்பயிற்சிகளைக் கடைப்பிடித்து, அதைக் கட்டுக்குள் வைத்திருக்கலாம்.

இது மட்டுமல்லாமல், புற்றுநோய் போன்றவற்றை ஆரம்பத்திலேயே கண்டறிவதால் நோயைக் குணப்படுத்துவதை எளிமையாகும்" என்கிறார் விஜய சக்கரவர்த்தி.

துபாயை கலக்கும் டாப் 10 பணக்காரர்கள்.

உலகிலேயே மிகவும் முன்னேற்றமான மற்றும் வேகமாக வளர்ந்து வரும் நகரமாக துபாய் திகழ்கிறது. இந்த நகரம் அதன் உயர்ந்த தனிநபர் வருமானம், சிறந்த சுற்றுலாத்தளம் மற்றும் திறந்த பொருளாதாரம் ஆகியவற்றிற்காக உலகின் பெரும் கவனத்தை ஈர்த்து வருகிறது.
துபாய் அனைத்து நாட்டவர்களுக்கும் ஒரு பரந்த திறந்த சந்தை மற்றும் உலகம் முழுவதும் இருந்து தொழிலதிபர்கள் மற்றும் தொழில்கள் பலவற்றை ஈர்த்து அங்கு வணிக உலகின் ஒரு பகுதியாக இருக்கும்படி செய்கிறது.
இந்த காரணத்தினாலேயே இந்நகரம் ஒவ்வொரு ஆண்டும் மில்லியனர்களையும் மற்றும் பில்லியனர்களையும் தொடர்ந்து உருவாக்கி வருகிறது. துபாயில் வசிக்கும் டாப் 10 பணக்காரர்களை பற்றியே நாம் இப்போது பார்க்கப்போகிறோம்.

10. சைஃப் அல் குர்ரர்

சைஃப் அஹ்மத் அல் குர்ரர், அல் குர்ரர் குழுமத்தின் தலைமை நிர்வாக அதிகாரி மற்றும் இயக்குநராக உள்ளார். இக்குழுமம் யுஏஇயில் வீட்டுமனை மற்றும் உற்பத்தி துறைகளில் செயல்படுகிறது. இக்குழுமம் எஃகு, அலுமினியம் போன்ற பல உற்பத்தித் தொழில்களிலும், அடேகா அல் குர்ரர் அடிட்டிவ்ஸ் மற்றும் தாக்லிஃப் இண்டஸ்ட்ரீஸ் என்ற பாறையெண்ணெய் வேதிப்பொருட்கள் தயாரிக்கும் துணை நிறுவனங்களையும் கொண்டுள்ளது.
அவர் எமிரேட்ஸில் முன்னணியில் இருக்கும் மாஷ்ரேக் வங்கியின் முன்னணி பங்குதாரர்களில் ஒருவராக திகழ்கிறார். சைஃப் அல் குர்ரரின் நிகர சொத்து மதிப்பு $2.1 பில்லியன் ஆகும். இந்த சொத்து மதிப்பானது அவரை துபாயில் வசிக்கும் பெரும் செல்வந்தராக காட்டுகிறது.

9. சன்னி வர்கீஸ

சன்னி வர்கீஸ் துபாய் சார்ந்த இந்திய கல்வி நிறுவன தொழிலதிபர். இவர் ஜெம்ஸ் எடுகேஷன் என்ற கல்வி நிறுவனத்தை 10 க்கும் மேற்பட்ட நாடுகளில் 130 க்கும் அதிகமான பள்ளிகளில் உலகெங்கும் உள்ள தனியார் k-12 பள்ளிகளின் மிகப்பெரிய நடத்துனர் ஆவார்.
1959 ஆம் ஆண்டில், சன்னி வர்கி கேரள கல்வியாளர்கள் மற்றும் கிறிஸ்தவர்களான அவரது பெற்றோருடன் துபாய் சென்றார். அவர்கள் பின்னர் துபாயில் உள்ள உள்ளூர் மக்களுக்கு ஆங்கிலம் கற்பித்தனர். 1977 ஆம் ஆண்டில் அவர் தனது பெற்றோர்களின் பள்ளிக்கூடத்தின் பொறுப்பேற்றார். பள்ளியை விரிவுபடுத்தினார். மேலும் புதிய பள்ளிகளையும் சேர்த்துக் கொண்டார்.
பின்னர் 2000 ஆம் ஆண்டில் வர்கி குளோபல் எஜுகேஷன் மேனேஜ்மென்ட் சிஸ்டம்ஸ் (ஜி.இ.எம்.எஸ்) என்ற ஆலோசனை மற்றும் கல்வி நிர்வாக நிறுவனத்தை நிறுவியதோடு, இப்பகுதியில் மிகவும் வெற்றிகரமான கல்வி கழகமாக மாற்றினார். அவருடைய நிகர சொத்து மதிப்பு $2.5 பில்லியன் ஆகும். மேலும் அவர் துபாயில் வசிக்கின்ற செல்வந்தர்களுள் ஒருவராக திகழ்கிறார்.

8. பி. ஆர். ஷெட்டி

பி.ஆர். ஷெட்டி 1972 ஆம் ஆண்டில் இந்தியாவில் இருந்து ஐக்கிய அரபு எமிரேட்ஸுக்கு குடிபெயர்ந்த கேரள தொழிலதிபர் ஆவார். இவர் ஐக்கிய அரபு எமிரேட்ஸில் உள்ள மிகப் பெரிய மருத்துவமனை சங்கிலியான என்எம்சி ஹெல்த்தின் நிறுவனர் ஆவார்.
மேலும் அவர் மருந்தியல் நிறுவனமான 'நியோபார்மா' நிறுவனத்தின் நிறுவனர், தலைமை நிர்வாக அதிகாரி மற்றும் மேலாண் இயக்குனர் ஆவார். அவரது பிஆர்எஸ் வென்ச்சர்ஸ் கெய்ரோவில் ஒரு மருத்துவமனையையும், அலெக்ஸாண்டிரியாவிலுள்ள ஒரு மருத்துவமனையையும், நேபாளத்தில் இரண்டு மருத்துவமனைகளையும் சொந்தமாகக் கொண்டது.
மேலும் 400-படுக்கைகள் கொண்ட மிகச்சிறப்பு வாய்ந்த மருத்துவமனையையும் கர்நாடகா, இந்தியாவில் உருவாக்குகிறது. ஷெட்டி ஒருகாலத்தில் இந்தியாவில் மருந்து விற்பனையாளராக இருந்தார், ஆனால் தற்போது துபாயில் வசிக்கும் 3.2 பில்லியன் டாலர் மதிப்புள்ள பணக்காரர்களில் ஒருவர் இவர்.

7. ஹூசைன் சஜ்வானி

'துபாயின் டொனால்ட்' என்று அழைக்கப்படும் ஹூசைன் சஜ்வானி, துபாய் சார்ந்த பில்லியனராகவும், குடியிருப்பு வீட்டுமனை கட்டுமான நிறுவனமான டாமாக் பிராபர்ட்டிஸ் நிறுவனர் மற்றும் தலைவர் ஆவார். 2002 ஆம் ஆண்டில், அவர் டாமாக் பிராபர்ட்டிஸ் நிறுவனத்தை நிறுவினார். இது மத்திய கிழக்கில் மிகப் பெரிய குடியிருப்பு வீட்டுமனை கட்டுமான நிறுவனமாக வளர்ந்துள்ளது.
துபாயின் சொத்து சந்தை விரிவாக்கத்தின் முன்னோடிகளில் ஒருவராக சஜ்வானி இருந்தார். இன்று அவர் துபாயில் 200க்கும் மேற்பட்ட திட்டங்களை நிர்வகிக்கும் மிக முக்கியமான நபர்களில் ஒருவர். துபாயில் டொனால்ட் டிரம்ப்பின் வர்த்தக கூட்டாளியாகவும், 2013 ஆம் ஆண்டு முதல் துபாய் நகரில் இரண்டு டிரம்ப் சர்வதேச கோல்ஃப் கிளப்பை உருவாக்கியுள்ளார். அவரது நிகர சொத்து மதிப்பு $3.4 பில்லியன் ஆகும்.

6. ரவி பிள்ளை

துபாயில் தற்போது வசித்து வரும் முதன்மையான 10 பணக்காரர்களின் வரிசையில் மற்றுமொரு இந்தியர் ரவி பிள்ளை ஆவார். இவர் வியாபாரத்தில் 70,000 க்கும் மேற்பட்ட பணியாளர்களை வேலைக்கு அமர்த்தி இருக்கும் ஆர்பி குழுமத்தின் நிறுவுனர் ஆவார். ரவி பிள்ளைக்கு பல்வேறு இதர தொழிற்துறைகளான கட்டுமானம், ஸ்டீல், சிமெண்ட், விருந்தோம்பல், எண்ணை மற்றும் எரிவாயு துறைகளிலும் ஆர்வம் இருக்கிறது.
மேலும் கேரளாவில் அவருக்கு சொந்தமாக ஒரு வணிகவளாகம் மற்றும் கொல்லம் நகரத்தில் ஆர்பி வணிகவளாகம் இருக்கின்றன. ரவி தனது வியாபாரத்தை அரேபிய எமீரகம், கத்தார், பஹ்ரைன் உள்ளிட்ட இதர நாடுகளிலும் விரிவுபடுத்தியுள்ளார் மேலும் இவர் மத்திய கிழக்கு நாடுகளில் மிகப்பெருமளவு எண்ணிக்கையில் இந்தியர்களை வேலைக்கு அமர்த்தும் நிறுவனங்களில் ஒருவராவார். இவர் துபாயிலுள்ள மிகப்பெரிய செல்வந்தர்களுள் ஒருவராவார் மேலும் இவருடைய சொத்து கிட்டத்தட்ட அமெரிக்க டாலரில் 3.6 பில்லியன் என்று மதிப்பிடப்பட்டுள்ளது.

5. அப்துல்லா அல் ஃபத்திம்

அப்துல்லா அல் ஃபத்திம் அல் ஃபத்திம் குழுமத்தை சொந்தமாகக் கொண்டிருக்கும் அதை நிர்வகிக்கும் தொழிலதிபரும் மற்றும் முதலீட்டாளரும் ஆவார். இது ஐக்கிய அரபு அமீரகத்தில் உள்ள மிகப்பெரிய பல்வேறு குழுமங்களின் ஒருங்கிணைந்த நிறுவனமும் மற்றும் ஹோண்டா மற்றும் டொயோட்டா வாகனங்களின் ஒரே விநியோகஸ்தரும் ஆவார்.
மேலும் அப்துல்லா அல் ஃபத்திம் பல்வேறு வித்தியாசமான தொழிற்துறைகளான காப்பீடு, சில்லறை வர்த்தகம், மின்னணு உற்பத்தி பொருட்கள், பொறியியல், சேவைகள், ரியல் எஸ்டேட் மற்றும் சொத்து மேம்பாடு போன்றவற்றை கையாளும் நிறுவனத்தை சொந்தமாகக் கொண்டிருக்கிறார். இதன் அனைத்துப் பிரிவுகளும் ஐக்கிய அரபு அமீரகத்திலும் அதன் சுற்றுப்புற பிரதேசங்களிலும் வெற்றிகரமாக செயல்பட்டு வருகின்றது.
இவருடைய குழுமம் 44,000 க்கும் மேற்பட்ட நபர்களை வேலையில் அமர்த்திக் கொண்டுள்ளது. இவருடைய சொத்துக்க்ளின் நிகர மதிப்பு அமெரிக்க டாலரில் 4.1 பில்லியன் ஆகும். இவர் துபாயில் வாழும் மிகப்பெரிய பணக்காரர்களில் ஒருவராவார்.

4. மிக்கி ஜக்தியானி

மிக்கி ஜக்தியானி ஒரு காலத்தில் லண்டனில் டாக்சி ஓட்டுனராகப் பணியாற்றிக் கொண்டிருந்தவர். தற்போது துபாயை அடிப்படையாகக் கொண்ட இந்தியத் தொழிலதிபராக ‘லேண்ட்மார்க் க்ரூப்' என்றழைக்கப்படும் துபாயை அடிப்படையாகக் கொண்ட சில்லறை விற்பனை கடைகளுக்கு சொந்தக்காரர்.
இவருடைய லேண்ட் மார்க் க்ரூப் நிறுவனத்தின் ஆண்டு வருமானம் அமெரிக்க டாலரில் 6 பில்லியன் மதிப்புடையதாக மதிப்பிடப்பட்டுள்ளது. லேண்ட்மார்க் நிறுவனம் ஆப்பிரிக்கா, இந்தியா மற்றும் மத்தியக் கிழக்கு நாடுகளில் 1,000 க்கும் மேற்பட்ட கடைகளைக் கொண்டிருக்கிறது. பல வருடங்களாக அவர் தனது நிறுவனத்தை ஃபேஷன், மின் சாதனங்கள், மரச்சாமான்கள் மற்றும் பட்ஜெட் உணவகங்கள் என்று மத்திய கிழக்கு நாடுகளிலும் மற்றும் தென்கிழக்கு ஆசியாவிலும் விரிவுபடுத்தியுள்ளார்.
ஏப்ரல் 2017 நிலவரப்படி, மிக்கி ஜக்தியானி அமெரிக்க டாலரில் 4.5 பில்லியன் நிகர மதிப்புடைய சொத்துக்களைக் கொண்டிருக்கிறார். இவர் துபாயிலுள்ள மிகப்பெரிய பணக்காரர்களில் நான்காவது இடத்திலும் மற்றும் உலகின் மிகப்பெரிய பணக்காரர்களில் ஒருவராகவும் இருக்கிறார்.

3. யூசுஃப் அலி எம்.ஏ

யூசுஃப் அலி எம்.ஏ இநதியாவில் பிறந்த துபாயை அடிப்படையாகக் கொண்ட ஒரு தொழிலதிபராவார். இவர் 1973 இல் அமீரகத்திற்கு இடம்பெயர்ந்தார். இவர் மத்திய கிழக்கு நாடுகளில் லூலூ உயர்சந்தை சங்கிலித்தொடர்களை சொந்தமாகக் கொண்டிருக்கும் லூலூ சர்வதேச குழுமத்தின் நிர்வாக இயக்குனர் ஆவார்.
உலக அளவில் இந்த லூலூ சர்வதேச குழுமம் அமெரிக்க டாலர் மதிப்பில் 7.4 பில்லியன் ஆண்டு விற்பனை அளவை கொண்டுள்ளது மேலும் இந்தியாவிற்கு வெளிப்புறத்திலிருந்து மிக அதிக அளவு எண்ணிக்கையில் இந்தியர்களை வேலைக்கு அமர்த்தியுள்ளது. மத்திய கிழக்கு நாடுகளில் யூசுஃப் அலி சில்லறை விற்பனையின் அரசனாக அறியப்படுகிறார். இவருக்கு இந்தோனேஷியா, எகிப்து, இந்தியா, மலேசியா மற்றும் வளைகுடா நாடுகளில் 133 கடைகள் இருக்கின்றன.
அமெரிக்க டாலர் மதிப்பில் 5.2 பில்லியன் தனிப்பட்ட சொத்துக்களுடன் தற்போது துபாயில் வசிக்கும் முதன்மையான 10 பணக்காரர்களின் எங்கள் பட்டியலில் யூசுஃப் அலி தற்போது மூன்றாவது இடத்தில் நிற்கிறார். யூசுஃப் அலி பல்வேறு சமூக நடவடிக்கைகளில் மிக நெருக்கமாக ஈடுபட்டுள்ளார். இவருடைய நிறுவனம் காஜாவிலும் நேபாளத்திலும் உள்ள துபாய் பராமரிப்பு மற்றும் தத்து பள்ளிகளுடன் கைகோர்த்துள்ளது.

2. அப்துல்லா அல் குரைர்

அப்துல்லா அல் குரைர் ஐக்கிய அரபு அமீரகத்திலுள்ள முன்னணி வங்கிகளில் ஒன்றான மாஷ்ரெக் வங்கியின் தலைவரும் நிறுவுனரும் ஆவார். இவர் 1954 ஆம் ஆண்டு நவம்பர் 2 ஆம் தேதி ஐக்கிய அரபு அமீரகத்தில் பிறந்தார். அல் குரைரின் குடும்ப செல்வம் பிற நிறுவனப் பங்குகளையும் கொண்ட நிறுவனமான அல் குரைர் குழுமம் என்றழைக்கப்படும் நிறுவனத்தால் கட்டுப்படுத்தப்படுகிறது.
இந்த குழுமம் உணவு, சில்லறை விற்பனை மற்றும் கட்டுமானத் தொழிற்துறைகளை கையாள்கிறது. அப்துல்லா அல் குரைர் மாஷ்ரெக் வங்கி தொடங்கப்பட்டது முதற்கொண்டு அதன் அதிபராகவும் தலைவராகவும் இருக்கிறார். இவர் ஐக்கிய அரபு அமீரகத்தின் மிக முக்கியமான தொழிலதிபர்களில் ஒருவராவார்.
2015 ஆம் ஆண்டு ஜுன் மாதம் அவர் தனது சொத்துக்களில் தோராயமாக மூன்றில் ஒரு பகுதியை அமீரகத்திலும் மற்றும் இதர அரோபிய நாடுகளிலுமுள்ள கல்வித் திட்டங்களுக்கு நன்கொடையாக அளிப்பதாக அறிவித்தார். இதன் குறிக்கோள் 15,000 அமீரக மாணவர்களுக்கு கல்வி உதவித்தொகை வழங்குவதாகும். அமெரிக்க டாலர் மதிப்பில் 7 பில்லியன் நிகர சொத்து மதிப்புடன் அப்துல்லா அல் குரைர் துபாயிலுள்ள மிகப் பெரிய பணக்காரர்களில் இரண்டாவது இடத்தைப் பிடிக்கிறார்.

1. மஜித் அல் ஃபத்தைம்

துபாய் நகரில் வசிக்கும் செல்வந்தர்களின் பட்டியலில் முதலிடம் பிடிப்பவர் மஜித் அல் ஃபத்தைம். 10.6 பில்லியன் மதிப்புள்ள நிகர சொத்து மதிப்பைக் கொண்டு, அவர் துபாய் நகரத்தின் பணக்காரராகவும் தொழிலதிபராகவும் உள்ளார். அவர் தனது சகோதரருடன் அல் ஃபத்தைம் சாம்ராஜ்யத்தை பிளவுபடுத்திய பின்னர், 1992 இல் மஜித் அல் ஃபத்தைம் குழுவை நிறுவினார்.
அவர் வைத்துள்ள நிறுவனமானது மத்திய கிழக்கு மற்றும் வட ஆப்பிரிக்காவில் வணிக வளாகங்கள், சில்லறை விற்பனை மற்றும் பல்பொருள் அங்காடி நிறுவனங்களை 15 சர்வதேச சந்தைகளில் செயல்படுத்தி, 33,000 க்கும் மேற்பட்ட மக்களை வேலைக்கு அமர்த்தியுள்ளது. மஜித் அல் ஃபத்தைம் நிறுவனம் துபாயில் உள்ள முதல் ஐந்து வணிக வளாகங்களில் ஒன்றான எமிரேட்ஸின் வணிக வளாகத்தை நடத்துகிறது. மஜித் அல் ஃபத்தைம் துபாயின் மிகப்பெரிய பணக்காரர் மற்றும் மத்திய கிழக்கில் இரண்டாவது பணக்காரர் ஆவார்.