மனிதர்களைக் கொல்லும் மிகவும் ஆபத்தான 10 வகை பாம்புகள்.

உலகம் முழுவதும் சுமார் 3900 வகையான பாம்புகள் காணப்படுகின்றன.

உலக சுகாதார அமைப்பின மதிப்பீட்டின் படி, உலகில் ஒவ்வொரு ஆண்டும் 81,410 முதல் 1,37,880 பேர் பாம்பு கடியால் இறக்கின்றனர்.

இது தவிர, 2000 முதல் 2019 வரை, இந்தியாவில் 12 லட்சம் பேர் பாம்பு கடியால் இறந்தனர். சராசரியாக, ஒவ்வொரு ஆண்டும் 58,000 பேர் இறந்தனர்.

ஒவ்வொரு ஆண்டும் உலகம் முழுவதும் 50 லட்சம் பேர் பாம்புக் கடியால் பாதிக்கப்படுகிறார்கள். இதில் 4 லட்சம் பேருக்கு உடலின் ஒரு பகுதியை துண்டிக்கப்பட வேண்டிய நிலை ஏற்படுகிறது அல்லது நிரந்தரமாக உடல் உறுப்புக்களில் பாதிப்பு ஏற்படுகிறது.

இந்தப் புள்ளிவி வரங்கள் திகைப் பூட்டுகிறது அல்லவா?

ஆனால் இதற்கு பின்னால் இருக்கும் ஒரே காரணம் பாம்புகள் தான்.

உலகின் பல நாகரிகங்கள் மற்றும் கலாச் சாரங்களில் பாம்பு ஒரு முக்கியப் பங்கு வகிக்கிறது. சில சமூகங்கள் அதை வணங்குகின்றன, சில அதைக் கண்டு அஞ்சுகின்றன.

சில பாம்புகள் உண்மையில் மிகவும் ஆபத்தானவை, ஆனால் சில பாம்புகள் உங்களுக்கு எந்தத் தீங்கும் செய்யாது.

சில வகைப் பாம்புகள் நூடுல்ஸ் போல மெல்லியவை, மற்றவை ஒட்டகச் சிவிங்கியை விட நீளமானதாகவும், முழு ஆடு அல்லது பன்றியை விழுங்கும் அளவுக்கு பெரியவையாகவும் இருக்கும்.

சுமார் 170 மில்லியன் ஆண்டுகளுக்கு முன்பு பாம்புகள் பரிணாம வளர்ச்சியால் பண்டைய பல்லிகளிடமிருந்து பிரிந்து தங்கள் கால்களை இழந்ததாக நம்பப்படுகிறது என்று சோபியா குவாக்லியா பிபிசி எர்த்தில் குறிப்பிடுகிறார்.

மரபணு ஆராய்ச்சியின் படி, பாம்புகளின் உண்மையான மூதாதையர் குறுகிய கால்விரல்கள் மற்றும் விரல்களைக் கொண்ட நீண்ட, மெல்லிய பல்லியாக இருக்கலாம்.

லாராசியாவின் சூடான காடுகளில் வாழ்ந்த பாம்புகள், இன்று வட அமெரிக்கா, கிரீன்லாந்து, ஐரோப்பா மற்றும் ஆசியா எனப் பிரிக்கப்பட்டுள்ளது.

உலகம் முழுவதும் சுமார் 3900 வகையான பாம்புகள் காணப்படுகின்றன, ஆனால் அவற்றில் 725 மட்டுமே விஷத்தன்மை கொண்டவை.

இவற்றில் 250 இனங்கள் ஒரு கடியால் ஒரு மனிதனைக் கொல்லும் தன்மை கொண்டவை.

அதேசமயம், விஷம் இல்லாத பாம்புகளும் மனிதர்களைக் கொல்லக் கூடும், ஆனால், ஆண்டு தோறும் ஒன்று அல்லது இரண்டு இறப்புகளுக்கு காரணமாக அமையும் அளவுக்கு இது போன்ற சம்பவங்கள் அரிதானவை.

உதாரணமாக, மலைப் பாம்புகள் தங்கள் இரையைச் சுற்றிக் கொண்டு மூச்சுத் திணறச் செய்து கொல்லலாம்.

உலகின் மிக ஆபத்தான 10 வகையான பாம்புகள் 

ஆயிரக்கணக்கான பாம்பு இனங்களில், ஒரு சில மட்டுமே விஷம் கொண்டவை.

விஷப் பாம்புகளைப் பற்றி நாம் பேசும் போது, ​​அதற்கு இரண்டு அர்த்தங்கள் இருக்கலாம்.

முதலில், அதிக மக்களை கொல்லும் பாம்பு அல்லது அதிக விஷம் கொண்ட பாம்பு. அதாவது மிகவும் விஷமுள்ள பாம்பு.

இவை இரண்டும் ஒரே மாதிரியானவை அல்ல.

அதிக விஷமுள்ள பாம்பு மனிதர்களுக்கு அருகில் வாழாமல் இருக்கலாம், அல்லது ஆக்ரோஷமாக இல்லாமல் இருக்கலாம்.

பாம்புக் கடியால் திசுக்கள் அழுகும் (நெக்ரோசிஸ்) நிலை ஏற்படலாம். இதனால் உடலின் ஒரு பகுதியை அகற்ற வேண்டிய நிலை வரலாம்.

விலங்கு நடத்தை ஆராய்ச்சியாளரும் அறிவியல் எழுத்தாளருமான லியோமா வில்லியம்ஸ், பிபிசி வனவிலங்கு இதழான டிஸ்கவர் வைல்டில், உலகின் மிகவும் ஆபத்தான மற்றும் விஷமுள்ள பத்து பாம்புகளை பட்டியலிட்டுள்ளார்.

1. சுருட்டை விரியன் (Saw-Scalded Viper)

மத்திய கிழக்கு மற்றும் மத்திய ஆசியாவில் காணப்படும் ஒரு வகையான பாம்பு செதில் விரியன் பாம்பு, மிகவும் ஆக்ரோஷமானது.

ஒவ்வொரு ஆண்டும் அதிக எண்ணிக்கையிலான மக்கள் உயிர் இழப்பதற்க்கு காரணமாகக் கருதப்படும் இந்தப் பாம்பு, அதிக மக்கள் தொகை கொண்ட பகுதிகளில் காணப்படுகிறது, இதன் காரணமாக இது மனிதர்களுக்கு மிகவும் ஆபத்தானதாக மாறுகிறது.

இந்தியாவில், இந்தப் பாம்பு ஒவ்வொரு ஆண்டும் சுமார் ஐயாயிரம் இறப்புகளை ஏற்படுத்துகிறது.

2. இன்லேன்ட் டைபன் (Inland Taipan)

மிகவும் விஷமுள்ள பாம்பைப் பொறுத்த வரை, இன்லேண்ட் தைபன் முன்னணியில் உள்ளது.

மத்திய ஆசியா மற்றும் ஆஸ்திரேலியாவில் காணப்படும் இந்த பாம்பு, முக்கியமாக எலிகளை வேட்டையாடுகிறது.

இந்தப் பாம்பு ஒரு கடி கடித்தால், நூறு பேரைக் கொல்லும் என்று கூறப்படுகிறது.

ஆனால், ஸா ஸ்கெல்ட் வைப்பரைப் போலல்லாமல், இது உயிரிழப்புகளை ஏற்படுத்தாது.

ஏனென்றால் இது மனிதர்கள் வாழும் பகுதிகளில் இருந்து விலகி, பெரும்பாலும் தொலை தூரப் பகுதிகளிலும், நிலத்தடியிலும் வாழ்கிறது.

3. கருப்பு மாம்பா (Black Mamba)

காட்டின் ராஜா எனக் கூறப்படும் சிங்கம் கூட சரணடையும் அளவுக்கான ஒரு பாம்பு தான் கருப்பு மாம்பா.

சப்-சஹாரா (சஹாராவுக்கு தெற்கே உள்ள ஆப்ரிக்க நாடுகள்) பிராந்தியத்தில் காணப்படும் இந்த பாம்பு தைபனை விட மிகவும் ஆக்ரோஷமானது.

பொதுவாக மனிதர்களிடமிருந்து விலகி இருக்கும் இந்த பாம்பு, ஆபத்தை உணர்ந்ததும் மின்னல் வேகத்தில் தாக்கும். உரிய சிகிச்சை அளிக்கப்படா விட்டால், கடித்த அரை மணி நேரத்திற்குள் ஒருவர் இறந்து விடுவார்.

4. கண்ணாடி விரியன் (Russell Viper)

இந்திய நாகப்பாம்பு, காமன் கிரெய்ட், செதில் விரியன் பாம்புடன் ரஸ்ஸல் வைப்பரையும் சேர்த்து பிக் ஃபோர் என்று அழைக்கிறார்கள்.

இந்த நான்கு பாம்புகளும் இந்திய துணைக் கண்டத்தில் அதிக உயிரிழப்புகளுக்கு காரணமாகின்றன.

ரஸ்ஸல் வைப்பர் கடிக்கும் போது, ​​ கடுமையான வலியை ஏற்படுத்தும்.

இது மிகவும் ஆக்ரோஷமாகவும், வேகமாகவும் செயல்படக் கூடியது. இந்தியாவில் காணப்படும் பாம்புக்கடிகளில் 43% சம்பவங்களுக்கு இந்த பாம்பே காரணம்.

5. கட்டு விரியன் (Common Krait)

பிக் ஃபோர் பாம்புகளில் ஒன்றான இந்த பாம்பு அதிக விஷத்தன்மை கொண்டது. அது கடித்தால் இறப்பதற்கான வாய்ப்புகள் 80% ஆக உள்ளது.

இதன் விஷத்தில் நியூரோடாக்சின்கள் உள்ளன, அவை தசை முடக்கம், சுவாசக் கோளாறு மற்றும் மரணத்தை கூட ஏற்படுத்தும்.

இது மற்ற பாம்புகள், எலிகள் மற்றும் தவளைகளை உண்ணும். இந்த பாம்பு மனிதர்களை நேருக்கு நேர் சந்திப்பது அரிது, ஆனால் இருட்டில் நீங்கள் அதன் மீது காலடி வைத்தால், அது நிச்சயமாக தாக்கும்.

6. இந்திய நாகப்பாம்பு (Indian Cobra)

இந்தியாவில் உள்ள மிகவும் ஆபத்தான பாம்புகளில் ஒன்று தான் இந்திய நாகப்பாம்பு.

முன்னதாக இந்தியாவில், பாம்பாட்டிகள் ஒவ்வொரு தெருவிலும் இந்தப் பாம்புடன் சுற்றித் திரிந்தனர்.

விஷத்தன்மை கொண்ட இந்தப் பாம்பு மிகவும் ஆக்ரோஷமானது. இது மனிதர்கள் வசிக்கும் பகுதிகளில் அல்லது அதற்கு அருகில் வாழ்கிறது. ஏனெனில் எலிகள் தான் அதன் முக்கிய இரையாக உள்ளன. அவை இந்த பகுதிகளில் ஏராளமாகக் காணப்படுகின்றன. அதனால் தான் இது மனிதர்களை அடிக்கடி சந்திக்கிறது.

7. பஃப் அடிர் (Puff Adder)

இந்த பாம்பு ஓடிப்போவதற்கு பதிலாக எதிர் கொள்கிறது.

இந்திய துணைக் கண்டத்திலிருந்து வெகு தொலைவில், பெரிய மற்றும் பயங்கரமான பஃப் அடிர் வகைப் பாம்புகள், ஆப்பிரிக்காவில் காணப்படுகிறன.

விரியன் குடும்பத்தைச் சேர்ந்த இந்தப் பாம்பு, மற்ற அனைத்து ஆப்பிரிக்க பாம்புகளையும் விட அதிக உயிரிழப்புகளை ஏற்படுத்துகிறது.

அச்சுறுத்தும் போது, ​​அது ஓடிப்போவதற்குப் பதிலாக நேராக எதிர்கொள்கிறது. மக்கள் கடந்து செல்லும் இடங்களில் பெரும்பாலும் ஓய்வெடுக்கிறது.

அது அதன் உடலை பெரிதாக்கி, சத்தத்தை எழுப்பி, தாக்குவதற்கு முன் அது ஒரு எச்சரிக்கையையும் அளிக்கிறது.

8. காமன் டெத் அடிர் (Common Death Adder)

இந்தப் பாம்பு ஆஸ்திரேலியாவின் காடுகளில் காணப்படுகிறது. இலைகளுக்கு இடையில் ஒளிந்து கொண்டு, இரை வரும்போது இவை தாக்கும்.

இதுபோன்ற பகுதிகளில் சுற்றித் திரியும் போது தற்செயலாக அதன் மீது கால் வைப்பவர்களுக்கு இது மிகவும் ஆபத்தானதாக மாறும்.

இதன் விஷம் ஒருவரின் உயிரைப் பறிப்பதற்கு போதுமானதாகவும், 60% மரணத்திற்கும் வழிவகுக்கிறது.

9. ராஜ நாகம் (King Cobra)

இந்த பாம்பு சராசரியாக நான்கு மீட்டர் நீளம் கொண்டது. அதிகபட்சமாக 5.85 மீட்டர் நீளம் வரை பதிவு செய்யப்பட்டுள்ளது.

இந்திய நாகப்பாம்பைப் போலவே, ராஜ நாகமும் இந்திய துணைக்கண்டத்தில் பெரும் கலாசார முக்கியத்துவத்தைக் கொண்டுள்ளது.

மனிதர்கள் அதன் பிரதேசங்களை ஆக்கிரமித்து வருகின்றனர். பாரம்பரிய சீன மருந்துகளில் பயன்படுத்துவதற்காகவும் இது வேட்டையாடப்படுகிறது.

இந்தியாவில் ராஜ நாகத்தை கொன்றால் சிறைத்தண்டனை விதிக்கப்படும்.

10. ஈஸ்டர்ன் டைமண்ட்பாக் ராட்டில்ஸ்னேக் (Eastern Diamondback Rattle snake)

இது வட அமெரிக்காவில் வாழும் மிகவும் ஆபத்தான பாம்பு.

ஆனால், இது ஆசியப் பாம்புகளை விட குறைவான ஆபத்தானதாகத் தெரிகிறது. மறுபுறம், அமெரிக்காவில் ஒவ்வொரு ஆண்டும் ஐந்து பேரின் உயிரிழப்புகளுக்கு காரணமாக அமைகிறது.

மிகப் பெரிய மற்றும் கனமான பாம்பான இதன் எடை 15 கிலோவுக்கு மேல் இருக்கும்.

இதன் விஷத்தில் ஹீமோடாக்சின் உள்ளது, இது இரத்த சிவப்பணுக்களைத் தாக்குகிறது.

இந்த பத்து பாம்புகளைத் தவிர, டைகர் ஸ்னேக், கோஸ்டல் தைபன் மற்றும் ஈஸ்டர்ன் பிரவுன் ஸ்னேக் ஆகியவை ஆபத்தான பாம்புகளாகக் கருதப்படுகின்றன.

பாம்புகளுக்கு வெவ்வேறு வகையான விஷங்கள் உள்ளதா?

நாகப்பாம்புகள், மாம்பாக்கள் மற்றும் கிரெய்ட்கள் நியூரோடாக்ஸிக் விஷத்தைக் கொண்டுள்ளன, அதே நேரத்தில் ராட்டில்ஸ்னேக்ஸ் மற்றும் அட்டர்ஸ் போன்ற விரியன் பாம்புகள் ஹீமோடாக்ஸிக் விஷத்தைக் கொண்டுள்ளன.

பாம்புகளுக்கு இரண்டு வகையான விஷங்கள் உள்ளன.

நியூரோடாக்ஸிக் விஷம் உடலின் நரம்பு மண்டலத்தைப் பாதித்து, பக்கவாதத்தை ஏற்படுத்துகிறது. அதே நேரத்தில் ஹீமோடாக்ஸிக் விஷம் இரத்தத்தைப் பாதித்து, திசு சேதத்தை ஏற்படுத்துகிறது.

நாகப் பாம்புகள், மாம்பாக்கள் மற்றும் கிரெய்ட்கள் நியூரோடாக்ஸிக் விஷத்தைக் கொண்டுள்ளன, அதே நேரத்தில் ராட்டில் ஸ்னேக்ஸ் மற்றும் அட்டர்ஸ் போன்ற விரியன் பாம்புகள் ஹீமோடாக்ஸிக் விஷத்தைக் கொண்டுள்ளன.

ஆனால் சில விதி விலக்குகளும் உள்ளன.

அதேபோல் சில பாம்புகளின் விஷம் உடலில் கலவையான விளைவுகளைக் கொண்டுள்ளது.

சில விரியன் பாம்புகள் நியூரோடாக்ஸிக் விஷத்தின் கூறுகளைக் கொண்டுள்ளன, மற்ற பாம்புகள் கலப்பு விஷத்தைக் கொண்டிருக்கலாம்.

இப்போது இந்தியாவில் பாம்பு கடியால் இவ்வளவு பேர் உயிரிழப்பதற்கு காரணம் என்ன என்ற கேள்வி எழுகிறது,

இதற்கு பதிலளிக்கும் விதமாக, பாம்புக் கடி சிகிச்சை மற்றும் கல்வி சங்கத்தின் தலைவரும் நிறுவனருமான பிரியங்கா கடம், இந்தியாவில் பல்லுயிர் பெருக்கம் மிகவும் வளமானது என்றும், மக்கள் தொகை அதிகமாக இருப்பதால் பாம்பு கடியால் அதிக எண்ணிக்கையிலான இறப்புகள் இங்குதான் நிகழ்கின்றன என்றும் கூறுகிறார்.

விரியன் பாம்பு இனத்தின் விஷம் ஹீமோடாக்ஸிக் வகையைச் சேர்ந்தது. இது இரத்தத்தை பாதிக்கிறது. இது இரத்தத்தை பாதித்து, உட்புற இரத்தப் போக்கை ஏற்படுத்துகிறது, இது உள் இரத்தக்கசிவு என்று அழைக்கப்படுகிறது.

அதனால் இரத்த நுண் குழாய்கள் வெடிக்கத் தொடங்குகின்றன. சிறுநீரகங்கள் பாதிக்கப்படுகின்றன.

ஒரு நபர் விரியன் பாம்பு கடித்தால் உடனடியாக இறக்க மாட்டார், ஆனால் அதனால் ஏற்படும் சிக்கல்கள் மிக அதிகமாக இருக்கும். ஹீமோடாக்ஸிக் விஷம் உடலில் நுழைந்தால், பாதிக்கப்பட்ட நபர் உயிர்வாழ முடியும், ஆனால் சிறுநீரகங்கள் சேதமடையலாம், உட்புற பிரச்னைகள் ஏற்படலாம், உறுப்புகள் பாதிக்கப்படலாம் என்று பிபிசியிடம் பிரியங்கா விளக்கினார்.

இவற்றைத் தவிர, க்ரைட் மற்றும் நாகப் பாம்பு போன்ற பாம்புகள் நியூரோடாக்ஸிக் விஷத்தைக் கொண்டுள்ளன என்றும் அவர் கூறினார்.

இந்த விஷம் நரம்பு மண்டலத்தைப் பாதிக்கிறது, அதன் பிறகு தசைகள் வேலை செய்வதை நிறுத்துகின்றன. நரம்பியல் அமைப்பை முடக்கும் இந்த விஷம், ஒரு மனிதனால் சுவாசிக்க முடியாத அளவுக்கு மோசமாக உயிரிழப்பை ஏற்படுத்தும் .

இதனால்தான் இதுபோன்ற பாம்புகள் கடித்த பிறகு உடனடி சிகிச்சை அளிக்கப் படாவிட்டால், இறப்புக்கான வாய்ப்புகள் மிக அதிகமாக உள்ளன.

விஷ எதிர்ப்பு மருந்து இல்லாதது ஒரு பெரிய சிக்கலாக உள்ளதா என்ற கேள்விக்கு, பிரியங்கா கடம் பதில் கூறுகையில், "இந்தியாவில், 'பிக் ஃபோர்' பாம்பு வகையை மையமாகக் கொண்டு விஷ எதிர்ப்பு மருந்து தயாரிக்கப்படுகிறது. நம் நாட்டில், குறிப்பாக வடகிழக்கில், பல்வேறு வகையான பாம்புகள் காணப்படுகின்றன, வங்காளத்தில் கிரேட்டர் பிளாக் கிரெய்ட், லெஸ்ஸர் பிளாக் கிரெய்ட் போன்ற பிற பாம்பு இனங்களும் உள்ளன. அவை கடிக்கும்போது, ​​சரியான விஷ எதிர்ப்பு மருந்து சரியான நேரத்தில் கிடைக்காதது உயிரிழப்புக்கான அபாயத்தை அதிகரிக்கிறது" என்றார்.

புரூஸ் லீயின் மகன் பிராண்டன் லீயின் மரணத்தை முன்னரே கணித்து விட்டாரா புரூஸ் லீ?

"தி க்ரோ" பட பிடிப்பில் நிஜ துப்பாக்கி பிராண்டன் லீயின் நெஞ்சை துளைக்க போகும்  கடைசி காட்சி 

உலகப் புகழ் புரூஸ் லீயின் மரணம் மற்றும் அவரின் மகன் பிராண்டன் லீயின் மரணமும் யாருமே நினைத்து கூட பார்க்க முடியாத மர்மங்களை பற்றி பார்க்கலாம்.

உலக புகழ் பெற்ற புரூஸ் லீயின் மரணத்தில் மர்மம் இருக்கிறது என நம் பலருக்கு தெரியும், ஆனால் அவரது மகன் பிராண்டன் லீயின் மரணத்திலும் மர்மம் இருப்பது உங்களுக்கு தெரியுமா? பிராண்டன் லீயின் மரணம் எப்படி இருக்கும் என்பதை முன்னாடியே ப்ரூஸ் லி கணித்திருக்ககூடும் எனவும் சொல்லப்படுகிறது எதை வைத்து அப்படி சொல்கிறார்கள்? இருவரது வாழ்விலும் என்ன நடந்தது? அவர்களின் மரணத்திற்கு பின்னால் உள்ள மர்மம் என்ன? வாருங்கள் காணலாம்.

         புரூஸ் லீ   

ப்ரூஸ் லீ இந்த பெயரைத் தெரியாதவர்களே இந்த உலகத்தில் இருக்க முடியாது. மார்ஷியல் ஆர்ட்ஸ் எனப்படும் சண்டைப் பயிற்சியில் பெரும் தேர்ச்சி பெற்றவர். இவர் சில படங்களே நடித்திருந்தாலும் இவர் நடித்த திரைப்படங்கள் எல்லாம் மிகப்பெரிய அளவில் ஹிட்டாகியது. இவர் படம் உலகம் முழுவதும் உள்ள பல்வேறு மொழிகளில் மொழி மாற்றம் செய்யப்பட்டு வர்த்தகம் செய்யும் அளவிற்கு பிரபலமானது.

மரணம்

இவ்வளவு பிரபலமான ப்ரூஸ் லி வெறும் 5 திரைப்படங்கள் மட்டுமே நடித்துள்ளார். இது ஏன் என பார்த்தால் அவர் 5 வது படம் நடிக்கும் போதே தனது 33 வது வயதிலேயே இறந்துவிட்டார். அதனால் அவரால் அதிகமான படங்கள் நடிக்க முடியவில்லை. எப்படி இறந்தார் என்றால் அதில் பல்வேறு மர்ம முடிச்சுகள் உள்ளன. அதிகாரப்பூர்வமாக இவர் மூளையில் வீக்கம் ஏற்பட்டு இறந்ததாக ஆதாரங்கள் உள்ளன.

மூளையில் வீக்கம்

ஆனால் எப்படி மூளையில் வீக்கம் ஏற்பட்டது என்பற்கு பல காரணங்கள் சொல்லப்படுகின்றன. டாக்டர்கள் ஹைப்பர் ஆக்டிவ்வாக இருந்ததால் இந்த பிரச்சினை ஏற்பட்டிருக்கலாம் என சொல்லப்படுகிறது. ஆனால் அவற் திட்டமிட்டு கொலை செய்யப்பட்டதாகவும் பேசப்படுகிறது.

கேம் ஆஃப் டெத்

1973ம் ஆண்டு ஜூலை 20ம் தேதி ப்ரூஸ்லி இறந்துவிட்டார். அவர் இறக்கும் போது "கேம் ஆஃப் டெத்" என்ற திரைப்படத்தில் நடித்துக்கொண்டிருந்தார். அது அவரது 5வது திரைப்படம். வாழ்வில் அவர் பெரும் எதிர்பார்த்த, அதிக செலவில் எடுக்கப்பட்ட திரைப்படமாக அந்த திரைப்படம் உருவாகிவந்தது. ஆனால் அந்த திரைப்படம் வெளியாவதற்கு முன்பே அவர் இறந்துவிட்டார். அவர் இறந்த பின்பு அந்த திரைப்படம் முடிந்து வெளியானது.

கொலை

அவர் இறப்பதற்கு முந்தைய நாள் அவர் வீட்டில் ஒரு வகையான கண்ணாடி வைக்கப்பட்டது. அது அந்த வீட்டில் உள்ள தீய சக்திகளை விரட்டும் என சொல்லப்பட்டது. ஆனால் அதில் மந்திர சக்திகளை ஏற்றி ப்ரூஸ் லீ கொல்லப்பட்டதாகவும் சொல்லப்படுகிறது. சிலர் அவர் மனைவியே அவருக்கு கொடுக்கும் உணவிலோ அல்லது மருந்திலோ மெல்ல சாகும் விஷம் கலந்த உணவை கொடுத்து அவரை கொலை செய்திருக்கலாம் எனவும் பேசப்படுகிறது.

பிராண்டன் லீ - எலிசா ஹட்டன் 

எது எப்படியோ அவர் இறந்துவிட்டார். அவர் கடைசியாக நடித்து வெளியான கேம் ஆஃப் டெத் திரைப்படமும் வெளியாகி மாபெரும் வெற்றி பெற்றுவிட்டது. ப்ரூஸ் லீ இறக்கும் போது அவருக்கு பிராண்டன் லீ என்ற மகன் இருந்தான். அவன் தன் தந்தையை போலவே தானும் திரைப்படங்களில் நடிக்க முடிவு செய்து சில திரைப்படங்களில் நடித்தான்.

பிரபலம்

பிராண்டன் லீ நடித்த திரைப்படங்கள் முதல் படம் ப்ரூஸ்லீக்காக ஓடிய நிலையில் அதில் அவரது நடிப்பை பார்த்த பலர் ப்ரூஸ்லீயை போல இவருக்கும் ரசிகர்களாகிவிட்டனர். இதனால் இவரது திரைப்படங்களும் ஹிட்டாகியது. அதனால் அடுத்தடுத்து திரைப்படங்களை எடுக்க முடிவு செய்து அடுத்தடுத்து படங்களை எடுத்தார்.

         தி க்ரோ      

இந்நிலையில் அவர் தனது 5 வது திரைப்படமாக "தி க்ரோ" என்ற திரைப்படத்தை எடுக்க முடிவு செய்தார். அதன் படி அந்த திரைப்படத்திற்கான படபிடிப்பு நடந்தது. அதில் துப்பாக்கியை வைத்து பிராண்டன் லீயை சுடும் காட்சிகள் பயன்படுத்தப்பட்டது. இதில் துப்பாக்கி க்ளோஸ் அப்பில் வரும் காட்சிகள் தத்ரூபமாக வர வேண்டும் என்பதற்காக உண்மையான துப்பாக்கியையும், லாங் ஷாட்டில் டம்மி துப்பாக்கியையும் பயன்படுத்த முடிவு செய்தனர்.

துப்பாக்கி

இதில் உண்மையான துப்பாக்கியும் டம்பி துப்பாக்கியும் கிட்டத்தட்ட ஒரே மாதிரியாக இருக்குமாறு தயார் செய்யப்பட்டது. இதில் உண்மையான துப்பாக்கியை வைத்து க்ளோஸ் அப் ஷாட் முதலில் எடுக்கப்பட்டது. பின்னர் லாங் ஷாட்டிற்காக டம்மி துப்பாக்கியை மாற்ற வேண்டும்.

குண்டு

ஆனால் அந்த நேரத்தில் ஏதோ குழப்பம் ஏற்பட்டு லாங் ஷாட்டில் டம்மி துப்பாக்கிக்கு பதிலாக உண்மையான துப்பாக்கியே வில்லன் கையில் வழங்கப்பட்டு வில்லன் பிராண்டன் லீயை சுடும் காட்சி படமாக்கப்பட்டது. இது படமாக்கப்படும்போது வில்லன் சுட்டதில் உண்மையான துப்பாக்கியிலிருந்து குண்டு பாய்ந்து பிராண்டன்லீ உடலை துளைத்தது.

மரணம்

இதில் பிராண்டன் லீ சம்பவ இடத்திலேயே துடிதுடித்து பலியாகிவிட்டார். பிராண்டன் லீ சாகும் போது அவருக்கு வயது வெறும் 28 தான். பிராடன் லீ இறந்த பின்பு அவரது சமாதி ப்ரூஸ் லீயின் சமாதியின் அருகிலேயே அமைக்கப்பட்டது. அதில் முக்கியமாக கவனிக்க வேண்டிய விஷயம் என்னவென்றால் பிராண்டன் லீ திரைப்படத்தில் அவர் இறந்த காட்சி படமாக்கப்பட்டது போல அவரது தந்தை கடைசியாக நடித்த கேம் ஆஃப் டெத் திரைப்படத்தில் ஒரு காட்சி இருந்தது.

எதர்ச்சியா?

அதே போல தான் பிராண்டன் லீ திரைப்படத்தில் காட்சிகள் அமைக்கப்பட்டிருந்தன. இது எதிர்ச்சியாக நடந்ததா அல்லது வேண்டுமென்றே இந்த காட்சிகள் திணிக்கப்பட்டதா என்பது தெரியவில்லை. அதே நேரத்தில் ப்ரூஸ்லீ தனது 5வது திரைப்படம் எடுக்கும் போதே இறந்ததை போல பிராண்டன் லீயும் 5வது திரைப்படத்திலேயே இறந்தது பலரை ஆச்சரியத்தில் ஆழ்த்தியது.

கொலையா?

அதேபோல பிராண்டன் லீயின் மரணத்திலும் மர்மம் இருப்பதாக கூறப்படுகிறது. அவரை கொல்ல வேண்டும் என்பதற்காக உண்மையான துப்பாக்கி வேண்டுமென்றே பயன்படுத்தப்பட்டது. இது விபத்தில்லை என ஒரு தரப்பினர் சொல்லுகின்றனர்.

இலுமினாட்டிகளா?

அதே நேரத்தில் பிரூஸ் லீ யின் மரணத்திற்கு இலுமினாட்டி போல சீனாவில் உள்ள ரகசிய அமைப்பான டைபண்ட் என்ற அமைப்பு தான் காரணம் என ஒரு தரப்பினர் கூறி வருகின்றனர். அவர்கள் பிராண்டன் லீயின் மரணத்திற்கும் அவர்கள் தான் காரணம் எனவும் சொல்லுகின்றனர்.

தீராத மர்மம்

உலக புகழ் பெற்ற ப்ரூஸ் லீயின் மரணம் மர்மானதை போல அவரது மகன் பிராண்டன் லீயின் மரணமும் மர்மமாகியுள்ளது பலரை வியப்பில் ஆழ்த்தியுள்ளது. இவை எல்லாம் எதிர்ச்சியாக நடந்தது தானா? அல்லது திட்டமிட்டமிட்டு நடத்தப்பட்டதா? எது எல்லாம் ஒரே மாதிரியாக நடத்தப்பட்டிருக்கும்? எல்லாமே தீராத மர்மம் தான்.

புரூஸ் லீ மரணம் பற்றி புதிய தகவல்: இதுவரை வெளியான காரணங்களும் சர்ச்சைகளும்

புரூஸ்லீ

தற்காப்புக் கலையை திரைப்படங்களின் வாயிலாக உலகளவில் கொண்டுபோய்ச் சேர்த்ததில் புரூஸ் லீக்கு தனி பங்குண்டு. லட்சக்கணக்கானவர்கள் அவருடைய திரைப்படங்களின் மூலம் தற்காப்புக் கலை மீது ஈர்ப்பு கொண்டனர்.

அவர் மர்மமான முறையில் 32 வயதில் உயிரிழந்தபோது, அவருடைய இறப்புக்குப் பல்வேறு காரணங்கள் சொல்லப்பட்டன. மாஃபியா கும்பல்கள் கொலை செய்து விட்டன என்பது முதல் 2018ஆம் ஆண்டில் சொல்லப்பட்ட வெப்ப அதிர்ச்சி வரை அந்தக் காரணங்களை தனித் தனியாகப் பட்டியலிடும் அளவுக்கு நீளமானது.

ஐரோப்பிய சிறுநீரக சங்கத்தின் அதிகாரபூர்வ ஆய்விதழான கிளினிக்கல் ஜர்னல் ஆஃப் கிட்னியின் இந்த ஆண்டுக்கான டிசம்பர் மாத பதிப்பு வெளியாகியுள்ளது.

அதில், புரூஸ் லீயின் இறப்பு மற்றும் அது குறித்த ஆய்வுகள் என்று கிடைக்கக்கூடிய தகவல்களை அடிப்படையாக வைத்து நடத்தப்பட்ட ஆய்வில், அவர் செரபிரல் ஒடிமா எனப்படும் மூளை வீக்கத்தால் பாதிக்கப்பட்டு, அதனால் ஏற்பட்ட ஹைபோநெட்ரீமியா என்ற பாதிப்புக்கு உள்ளாகி உயிரிழந்ததாகக் கூறுகிறது.

ஹைபோநெட்ரீமியா இருந்ததற்கான பல காரணிகள் ப்ரூஸ் லீயிடம் இருந்ததாகவும் அந்த ஆய்வுக் கட்டுரை கூறுகிறது.

அதில் “நாள்பட்ட அதிக திரவ உட்கொள்ளலைத் தூண்டக்க்கூடிய வகையில், தாகத்தை கடுமையாக அதிகரிக்கும் காரணிகள்(கஞ்சா பயன்பாடு), ஆன்டிடியூரிக் ஹார்மோன் சுரப்பதை ஊக்குவிப்பதன் மூலம் சிறுநீரகத்துடைய நீரை வெளியேற்றும் திறனைக் குறைப்பது அல்லது சிறுநீரகக் குழாய்களின் நீர் வெளியேற்ற வழிமுறைகளில் குறுக்கிடக்கூடிய மருந்துகளை உட்கொள்ளுதல் (ஸ்டெராய்ட், அழற்சி எதிர்ப்பு மருந்துகள், ஓபியாய்டுகள்), மது அருந்துதல், கடுமையான சிறுநீரக காயம், கடந்த காலத்தில் கடுமையான சிறுநீரக காயம்” போன்றவை இருந்ததாகக் குறிப்பிடுகிறது.

புரூஸ்லீ உயிரிழந்த நாளில் என்ன நடந்தது 

புரூஸ் லீ உயிரிழந்த நாளன்று என்ன நடந்தது என்பதைக் குறித்து பொதுவெளியில் இருக்கக்கூடிய தகவல்களை இந்த ஆய்வுக்கட்டுரை விவரிக்கிறது. அந்த விவரங்கள்:

அவர் உயிரிழந்த நாளன்று, புரூஸ் லீயும் அவரது படங்களுக்கு தயாரிப்பாளராக இருந்த ரேமண்ட் சோவும் லீயின் காதலி என்று கருதப்பட்ட பெட்டி டிங் பெயின் வீட்டிற்கு காரில் சென்றனர்.

டிங் பெய் உடன் லீ சில மணிநேரத்தைத் தனியாகக் கழித்தார். பிறகு அங்கு தன்னுடைய வரவிருந்த திரைப்படத்தின் சில காட்சிகளைத் தீவிரமாக நடித்துப் பார்த்தார். அவர் வீட்டிற்குச் செல்வதற்கு முன்பாக கஞ்சாவை பயன்படுத்தியிருந்தார்.

இரவு 7:30 மணியளவில் தண்ணீர் குடித்த அவருக்கு, தலைவலியும் தலை சுற்றலும் ஏற்பட்டது. டிங் பெய் அவருக்கு ஒரு ‘எக்வாஜெசிக்’ மாத்திரையைக் (அவர் முன்பே எடுத்துள்ள மெப்ரோபாமேட் மற்றும் ஆஸ்பிரின் கலவை) கொடுத்தார். லீ ஓய்வெடுப்பதற்காகப் படுக்கையறைக்குச் சென்றார்.

மனைவி லிண்டாலீ, மகன் பிராண்டன்லீ 

அந்த நேரத்தில் ரேமண்ட் சோவ் அங்கிருந்து கிளம்பினார். இரவு 9:30 மணியளவில், லீ மயங்கிய நிலையில் இருப்பதை டிங் பெய் கண்டார். அவரை எழுப்ப முயன்றும் எந்தப் பலனும் இல்லை.

பிறகு கிளம்பிச் சென்ற சோவை அழைத்தார். அவர்கள் ஒரு மருத்துவரை அழைத்தனர். மருத்துவர் 10 நிமிடத்திற்கு சிபிஆர் முறை மூலம் இதயத்தை மீண்டும் துடிக்க வைக்க முயன்று தோல்வியுற்றார்.

லீ அருகிலிருந்த மருத்துவமனைக்குக் கொண்டு செல்லப்பட்டார். அங்கு அவர் இறந்துவிட்டதாக அறிவிக்கப்பட்டது.

பிரேத பரிசோதனையில் வெளிப்புற காயங்களோ நாக்கைக் கடித்ததற்கான அறிகுறியோ எதுவும் இல்லை. கடுமையான பெருமூளை வீக்கத்தால் 1,400 கிராம் எடை இருக்க வேண்டிய மூளை 1,575 கிராம் எடைக்கு இருந்தது.

புரூஸ்லியின் மகன் ப்ராண்டன்லீ

வயிற்றில் கஞ்சாவின் தடயங்கள் கண்டுபிடிக்கப்பட்டன. ப்ரூஸ் லீயின் மரணம் எக்வாஜெசிக் மாத்திரைக்கு அதிக உணர்திறன் கொண்டிருந்ததால் ஏற்பட்ட பெருமூளை வீக்கம் தான் காரணம் என்று அதிகாரபூர்வமாகத் தீர்மானிக்கப்பட்டது.

லீ மரணத்தின் மற்ற காரணங்களும் புதிய ஆய்வு சொல்லும் விளக்கங்களும்

“லீ அந்த மாத்திரையை முன்பும் பயன்படுத்தியுள்ளார். அவர் உயிரிழந்த நாளன்று கூட, உடல்நலம் சரியில்லாமல் போன ‘பிறகு தான்’ அதை எடுத்துள்ளார். ஆகவே அவருக்கு இந்த மாத்திரையை எடுக்கும் முன்னரே அறிகுறிகள் தென்பட்டன.

மேலும், எக்வாஜெசிக் மாத்திரை தான் காரணமாக இருந்திருந்தால், உடற்கூறாய்வில் மூளை வீக்கம் மட்டுமே ஒரு தடயமாகக் கிடைத்திருக்காது,” என்று கிளினிக்கல் கிட்னி ஜர்னலில் வெளியாகியுள்ள புதிய ஆய்வு கூறுகிறது.

புரூஸ்லீ மகள் ஷான்னோன்லீ 

அவர் இறப்பதற்கு முந்தைய மாதமான மே 10ஆம் தேதியன்று அவருக்கு வலிப்பு ஏற்பட்டது. ஆகவே அவருடைய மரணத்திற்கு 'வலிப்பு' காரணமாக இருக்கலாம் என சொல்லப்பட்டது

ஆனால், “அது ஒரேயொரு நிகழ்வு தான்” எனக் கூறும் இந்த ஆய்வுக்கட்டுரை, அவர் மே 29, 30 ஆகிய தேதிகளில் நரம்பியல் மருத்துவர் டேவிட் ரெய்ஸ்போர்டிடம் முழு நரம்பியல் பரிசோதனையைச் செய்திருந்ததாகவும் அந்தப் பரிசோதனைகளில் அவருடைய மூளையின் செயல்பாட்டில் எந்தவொரு பிரச்னையும் கண்டுபிடிக்கப்படவில்லை எனவும் கூறுகிறது.

மேலும், “அவருக்கு ஃபெனிடோய்ன் என்ற மருந்து பரிந்துரைக்கப்பட்டிருந்தது. அதை அவர் உயிரிழந்த நாள் வரை எடுத்துள்ளார்.

ஒருவேளை வலிப்பு ஏற்பட்டு இறந்திருந்தால், அவருடைய நாக்கு கடிக்கப்பட்டிருக்க வேண்டும், மூளை வீக்கத்தோடு, நுரையீரலும் அதிக திரவம் சேர்ந்து வீங்கியிருக்க வேண்டும். இவை எதுவும் இல்லையென்று உடற்கூராய்வு பதிவுகள் கூறுகின்றன. அதனால் அவர் வலிப்பு நோயால் இறக்கவில்லை,” என ஆய்வில் கூறப்பட்டுள்ளது.

1973ஆம் ஆண்டில், அவர் உயிரிழந்த ஜூலை 20ஆம் தேதியன்று அதிகபட்ச வெப்பநிலை பதிவானதாகவும் அதில் ஏற்பட்ட வெப்ப அதிர்ச்சியால் (Heat stroke) அவர் உயிரிழந்ததாகவும் 2018ஆம் ஆண்டு கூறப்பட்டது.

ஆனால், “வெப்ப அதிர்ச்சியின்போது உடலுறுப்புகளின் வெப்பநிலை 40 டிகிரி செல்ஷியஸுக்கும் மேலே இருக்கும். தோல் வெப்பம் மிகுந்து, வறண்டு காணப்படும். மத்திய நரம்பு மண்டலத்தில் அசாதாரணங்கள் தென்பட்டிருக்கும்.”

“2018ஆம் ஆண்டில் வெப்ப அதிர்ச்சியே காரணமென்று கூறிய மேத்யூ போல்லி, மே 10ஆம் தேதியன்று ப்ரூஸ் லீக்கு வியர்வைச் சுரப்பிகள் அகற்றப்பட்டதாகவும் அது அவர் வெப்ப அதிர்ச்சிக்கு உள்ளாவதற்கான வாய்ப்புகளை அதிகப்படுத்தியதாகவும் கூறியுள்ளார்,” எனக் கூறும் புதிய ஆய்வு, வெப்ப அதிர்ச்சிக்கான வாய்ப்புகளை இது அதிகரிக்காது என்று வாதிடுகிறது.

அதுமட்டுமின்றி, அவர் உயிரிழந்த நாளன்று ஹாங்காங்கில் 25 முதல் 32 டிகிரி செல்ஷியஸ் வரை இருந்ததாகவும் இது அங்கு வழக்கமான வெப்பநிலையே என்றும் குறிப்பிட்டதோடு, அவருடைய உடற்கூறாய்வு அறிக்கையில் உடல் உறுப்புகள் செயலிழப்பு ஏற்பட்டதற்கான ஆதாரங்கள் இல்லையென்றும் கூறுகிறது.

மகன் பிராண்டன்லீ 

இறப்புக்கு சொல்லப்படும் புதிய காரணம்

ஹைபோநெட்ரீமியா இருந்ததற்கான பல காரணிகள் புரூஸ் லீயிடம் இருந்ததாகவும் அந்த ஆய்வுக் கட்டுரை கூறுகிறது.

அதில் “நாள்பட்ட அதிக திரவ உட்கொள்ளலைத் தூண்டக்கூடிய வகையில், தாகத்தை கடுமையாக அதிகரிக்கும் காரணிகள்(கஞ்சா பயன்பாடு), ஆன்டிடியூரிக் ஹார்மோன் சுரப்பதை ஊக்குவிப்பதன் மூலம் சிறுநீரகத்துடைய நீரை வெளியேற்றும் திறனைக் குறைப்பது அல்லது சிறுநீரகக் குழாய்களின் நீர் வெளியேற்ற வழிமுறைகளில் குறுக்கிடக்கூடிய மருந்துகளை உட்கொள்ளுதல் (ஸ்டீராய்ட், அழற்சி எதிர்ப்பு மருந்துகள், ஓபியாய்டுகள்), மது அருந்துதல், கடுமையான சிறுநீரக காயம், கடந்த காலத்தில் கடுமையான சிறுநீரக காயம்” போன்றவை இருந்ததாகக் குறிப்பிடுகிறது.

அமெரிக்காவில் சியாட்டிலின் லேக் வியூ புதைவிடத்தில் ப்ரூஸ் லீ மற்றும் அவருடைய மகன் பிராண்டன் லீயின் சமாதி

புரூஸ்லீயும், மகன் பிராண்டன் லீயும் அடக்கம் செய்த கல்லறை 

அத்துடன், “லீ மே 10ஆம் தேதியன்றே மூளை வீக்கத்தால் பாதிக்கப்பட்டார். அவர் ஹாங்காங்கில் ஒரு டப்பிங் வேலையில் இருக்கும்போது, தலை வலியும் தலை சுற்றலும் ஏற்பட்டது. அதன் பிறகு அவர் மதியம் சாப்பிட்டதையும் வாந்தியெடுத்துள்ளார். அவரால் நிற்க முடியாமல் தடுமாறியுள்ளார்.

அவரை அருகிலிருந்த பாப்டிஸ்ட் மருத்துவமனைக்குக் கொண்டு சென்றபோது, மூளை வீக்கம் ஏற்பட்டிருந்தது கண்டறியப்பட்டது.

அதன்பிறகு அவர் அமெரிக்காவில் மருத்துவர் ஹேரால்ட் எல்.கார்ப்மனிடம் மே 25ஆம் தேதியன்று மீண்டும் பரிசோதனை மேற்கொண்டபோது மே 10ஆம் தேதி பாப்டிஸ்ட் மருத்துவமனை பரிசோதனையில் அவருடைய ரத்த யூரியா நைட்ரஜன் அளவு அசாதாரணமாக இருந்ததாகவும் 25ஆம் தேதி இயல்பாக இருந்ததாகவும் தெரிகிறது. இது அவருக்கு முன்பே சிறுநீரக காயம் ஏற்பட்டிருந்ததைக் காட்டுகிறது,” என்று புதிய ஆய்வு கூறுகிறது.

தண்ணீரை அதிகமாகச் சேர்த்துக் கொள்வதற்கு மேற்குறிப்பிட்ட காரணங்கள் போக, “லீயின் மனைவி லிண்டா, அவருடைய அதிக நீர்ச்சத்து கொண்ட உணவுமுறை குறித்தும் கூறியுள்ளார்.

அவர் உயிரிழந்த நாளிலும் போல்லி, அவர் அதிகளவு தண்ணீர் அருந்தியதைப் பற்றி பேசினார்,” என்று குறிப்பிடும் இந்த ஆய்வுக்கட்டுரையில், புரூஸ் லீ மூளை வீக்கத்தால் ஏற்பட்ட ஹைபோநெட்ரீமியாவால் உயிரிழந்ததாக தெரிவிக்கப்பட்டுள்ளது.

10 மாதம், 25 நாட்கள் 6,500 கி.மீ நடை பயணமாகவே ஹஜ் பயணம்

               ஆதம் முஹம்மது 

ஹஜ் பயணம்: 10 மாதம், 25 நாள்கள்; 6,500 கி.மீ நடந்தே மெக்கா சென்ற நபர்; காரணம் இதுதான்!

இங்கிலாந்தைச் சேர்ந்த ஆதம் முகம்மது 10 மாதம், 25 நாட்கள் 6,500 கி.மீ நடை பயணமாகவே ஹஜ் பயணம் மேற்கொண்டு மெக்கா சென்றடைந்துள்ளார்.

இஸ்லாம் மார்க்கத்தின் முக்கியமான கடமைகளில் ஒன்று ஹஜ் பயணம். அதன்படி இஸ்லாமியர்கள் அனைவரும் தங்கள் வாழ்வில் ஒருமுறையாவது ஹஜ் பயணம் செல்ல வேண்டும். எனவே ஒவ்வொரு வருடமும் ஏராளமாக இஸ்லாமியர்கள் மெக்கா செல்வது வழக்கம்.

அப்படி செல்பவர்கள் பெரும்பாலும் விமானம் அல்லது வாகனங்கள் மூலமாக செல்வார்கள். ஆனால் இங்கிலாந்தைச் சேர்ந்த ஒருவர் 10 மாதம், 25 நாட்கள் 6,500கிமீ நடைப்பயணமாகவே ஹஜ் பயணம் மேற்கொண்டு மெக்கா சென்றடைந்திருக்கிறார். இங்கிலாந்தைச் சேர்ந்த 52 வயதான ஆதம் முகம்மது என்பவர் கடந்த 2021-ம் ஆண்டு ஆகஸ்ட் மாதம் 1-ம் தேதி இங்கிலாந்தில் உள்ள வால்வர் ஹாம்ப்டனில் இருந்து தனது மெக்கா செல்லும் ஹஜ் பயணத்தைத் தொடங்கியுள்ளார். இவர், நெதர்லாந்து, ஆஸ்திரேலியா, ஹங்கேரி, செர்பியா, பல்கேரியா, துருக்கி, லெபனான் மற்றும் ஜோர்டான் வழியாக நடைபயணம் சென்று சவூதியை அடைந்து தற்போது மெக்கா சென்றடைந்துள்ளார்.

இது பற்றி இணையதளம் பக்கம் ஒன்றில் எழுதிய அவர், "ஹஜ் யாத்திரை இறைவனுக்காக... ஆனால் நடைபயணம் செல்லவேண்டும் என்பதை வெறும் புகழுக்காகவோ, பணத்துக்காகவோ செய்யவில்லை. நம் இனம், நிறம், மதம் எதுவாக இருந்தாலும் மனிதர்களாகிய நாம் அனைவரும் சமம் என்பதை உலகுக்கு எடுத்துரைக்கவும், இஸ்லாம் கற்றுத்தரும் அமைதி மற்றும் ஒற்றுமையின் செய்தியைப் பரப்பவும் மட்டுமே இதை நான் செய்தேன்" என்று கூறினார்.

ஒரு முகலாய காதல் வரலாறு.

தாஜ்மஹால் : இடம் மாறி,மாறி ஷாஜஹானால் 3 முறை அடக்கம் செய்யப்பட்ட மும்தாஜ் - ஒரு முகலாய காதல் வரலாறு.

ஷாஜகானின் உயரம் சற்று குறைவாக இருந்தாலும், அவர் பருமனான உடல் மற்றும் பரந்த தோள்கள் பெற்றவர். இளவரசராக இருந்த வரை, தந்தை ஜஹாங்கீர், தாத்தா அக்பர் போன்று மீசையை மட்டுமே வைத்திருந்தார். அரசரான பிறகு தாடி வளர்க்கத் தொடங்கினார்.

ஷாஜகானின் ஆட்சிக் காலத்தில் முகலாய சாம்ராஜ்யத்தின் பெருமை அதிகம் வெளிப்பட்டது. அவர் தனது தந்தையைப் போல அடிக்கடி மனநிலை மாறும் தன்மை கொண்டவரில்லை. அவர் மென்மையாகவும், கண்ணியமாகவும் பேசுபவர், எப்போதும் முறையான மொழியில் பேசினார்.

முகலாயர்களைப் பற்றிய புத்தகமான 'எம்பரர்ஸ் ஆஃப் த பீகாக் த்ரோன்- த சாகா ஆஃப் தி கிரேட் முகல்ஸ்' என்ற புத்தகத்தை எழுதிய ஆபிரகாம் இரலி, "சுய கட்டுப்பாடு ஷாஜகானுக்கு மிக உயர்ந்த குணமாக இருந்தது. இது மது மீதான அவரது அணுகுமுறையில் பிரதிபலிக்கிறது. 24 வயதில், அதுவும் முதன்முதலாக மதுவை சுவைக்க தந்தை வற்புறுத்தியபோது அதையும் சுவைத்தார். அடுத்த ஆறு வருடங்கள் அரிதாகவே அருந்தினார். 1620-ம் ஆண்டு தெற்கு நோக்கிப் பயணத்தை மேற்கொண்டபோது முழுவதுமாக அந்தப் பழக்கத்தைக் கை விட்டு, மொத்த மதுபான இருப்பையும் சம்பல் ஆற்றில் ஊற்றினார்," என்று குறிப்பிடப்பட்டுள்ளது.

முற்றிலும் மும்தாஜ் மஹாலுக்கு அர்ப்பணம்

ஷாஜஹான் ஒரு பழமைவாத முஸ்லிமாக வாழ்ந்தாலும், அவர் ஒரு துறவி போல வாழவில்லை. புகழுக்கும் பெருமைக்கும் அவரது தந்தை ஜஹாங்கீரைப் போலவே இவரும் மிகவும் ஆசைப்பட்டார். இத்தாலிய வரலாற்றாசிரியர் நிக்கோலாவோ மனூச்சி, "ஷாஜஹான் அரண்மனையிலிருந்து தனது கவனத்தைத் திசைதிருப்ப இசை மற்றும் நடனத்தை நாடினார். அவர் பலவிதமான இசைக்கருவிகள் மற்றும் கவிதைகள் கேட்பதை வழக்கமாகக் கொண்டிருந்தார். அவரே நன்றாகப் பாடுவார். கஞ்சன் என்றழைக்கப்படும் நடனப் பெண்களின் குழு ஒன்று எப்போதும் தயாராக இருந்தது," என்று எழுதுகிறார்.

ஷாஜஹானின் அராஜகங்கள் குறித்த பல கதைகள் உலவினாலும் அவரது மனைவி மும்தாஜ் மஹால் உயிருடன் இருக்கும் வரை, அவர் முழுவதுமாக அவருக்கான அர்ப்பணிப்புடன் இருந்தார். அவருடைய மற்ற மனைவிகளுக்குக் கூட அவரது தனிப்பட்ட வாழ்க்கையில் மிகுந்த முக்கியத்துவம் இல்லை.

ஷாஜகானின் அரசவையில் இருந்த வரலாற்றாசிரியர் இனாயத் கான் தனது 'ஷாஜஹன் நாமா' புத்தகத்தில், " அரண்மனையிலோ வெளியிலோ, ஷாஜகானுக்கு மும்தாஜின் மீதிருந்த ஈடுபாட்டில் ஆயிரத்தில் ஒரு பங்கு கூட மற்ற பெண்கள் மீது இல்லை. அவர் இல்லாமல் இவரால் வாழ முடியாது." என்று எழுதுகிறார்.

இறுதி நொடிகளில் மும்தாஜ் பெற்ற வாக்குறுதி

ஷாஜஹான் மீது தீராத அன்பு கொண்டிருந்த மும்தாஜ், வெறும் அழகுப் பதுமையாக மட்டும் இல்லாமல், ஜஹாங்கீருக்கு அவர் மனைவி நூர்ஜஹான் இருந்தது போல, அரசாட்சியிலும் ஷாஜஹானுக்கு உறுதுணையாயிருந்தார். ஷாஜஹான் பதவியேற்ற நான்கு ஆண்டுகளுக்குள் மும்தாஜ் மறைந்து விட்டார். அப்படி நேர்ந்திருக்காவிட்டால், முகலாய சாம்ராஜ்யத்தில் மும்தாஜின் செல்வாக்கு பன்மடங்கு அதிகரித்திருக்கும் என்றும் கூறப்படுகிறது.

இனாயத் கான், "மும்தாஜ் மிகவும் பலவீனமான தனது கடைசி தருணங்களில், சக்கரவர்த்தியிடம் வேறு எந்தப் பெண்ணிடமிருந்தும் குழந்தை பெற்றுக்கொள்வதில்லை என்று வாக்குறுதி பெற்றார். தான் கனவில் ஓர் அழகான அரண்மனையையும் தோட்டத்தையும் கண்டதாகவும் தனது நினைவாக அது போன்ற ஒரு கல்லறையை எழுப்பும்படியும் கோரினார்" என்று எழுதுகிறார்.

மும்தாஜ் ஜூன் 17, 1631 அன்று புர்ஹான்பூரில் இவ்வுலகை விட்டுப் பிரிந்தார். 14வது குழந்தையை பெற்றெடுக்கும் போது அவருக்கு 30 மணி நேரம் பிரசவ வலி ஏற்பட்டது.

முன்னதாக, ஷாஜகான் தனது மனைவியைக் கடவுள் காப்பாற்றுவார் என்ற நம்பிக்கையில் ஏழைகளுக்குப் பணத்தை விநியோகித்தார், ஆனால் மருத்துவர்களின் முயற்சிகளையும் மீறி அவர் உயிர் பிரிந்தது.

திடீரென நரைத்த தாடி

இனாயத் கான், "இந்த மரணம் ஷாஜஹானை மிகவும் மோசமாகப் பாதித்தது. அவர் ஒரு வாரம் முழுவதும் தனது அறையை விட்டு வெளியே வரவில்லை, அரண்மனையின் எந்த வேலையிலும் பங்கேற்கவில்லை. அவர் இசையை ரசிப்பது, பாடுவது, நல்ல ஆடைகளை அணிவது என எல்லாவற்றையும் துறந்தார். அடுத்த இரண்டு வருடங்களுக்கு, மும்தாஜ் இறந்த புதன் கிழமைதோறும் வெள்ளை ஆடை மட்டுமே அணிந்தார். அழுது அழுது கண்கள் வலுவிழந்து, கண்ணாடி அணிய வேண்டிய கட்டாயம் ஏற்பட்டது," என்று எழுதுகிறார்.

"இந்தச் சம்பவத்திற்கு முன், அவரது தாடி மற்றும் மீசையில் சில வெள்ளை முடிகள் மட்டுமே இருந்தன, அதை அவர் கையால் பிடுங்கி எறிந்தார். ஆனால் சில நாட்களில், அவரது தாடியில் மூன்றில் ஒரு பங்கு வெள்ளையாக மாறியது. ஒரு கட்டத்தில் அவர் அரியணையைத் துறக்க முடிவு செய்தார். அவரும் மனதில் உறுதி பூண்டார், ஆனால் ராஜ்ஜியம் என்பது தனிப்பட்ட பிரச்னையால் கைவிட முடியாத ஒரு புனிதமான பொறுப்பு என்று நினைத்து அதைச் செய்யவில்லை," என்று அப்புத்தகத்தில் குறிப்பிடப்பட்டுள்ளது.

மும்தாஜ் மஹால் மூன்று முறை அடக்கம்.

மும்தாஜ் மஹால் உடல் முதன்முதலில் புர்ஹான்பூரில் உள்ள தப்தி நதிக்கரையில் உள்ள தோட்டத்தில் புதைக்கப்பட்டது. ஆறு மாதங்களுக்குப் பிறகு, அவரது உடல் அங்கிருந்து தோண்டி எடுக்கப்பட்டு 15 வயது இளவரசர் ஷா ஷுஜாவின் மேற்பார்வையில் ஆக்ராவுக்குக் கொண்டுவரப்பட்டது, அங்கு ஜனவரி 8, 1632 அன்று யமுனைக் கரையில் மீண்டும் அடக்கம் செய்யப்பட்டார். ஆனால் இதுவும் அவரது இறுதி ஓய்விடமாக அமையவில்லை.

அங்குதான் ஷாஜகான் இன்னொரு கல்லறையைக் கட்டினார், அதற்கு அவர் 'ரவுசா-இ-முனவ்வரா' என்று பெயரிட்டார், இது பின்னர் தாஜ்மஹால் என்று அழைக்கப்பட்டது. இந்தக் கல்லறையைக் கட்டும் பொறுப்பு மிர் அப்துல் கரீம் மற்றும் மகர்மத் கான் ஆகியோரிடம் ஒப்படைக்கப்பட்டது.

ஜஹாங்கீர் ஆட்சியின் போது தெற்கு இரானில் உள்ள ஷிராஸ் நகரத்திலிருந்து முகமத் கான் இந்தியாவிற்கு வந்தார். ஷாஜகான் அவரை தனது கட்டுமானத் துறை அமைச்சராக்கினார். 1641ஆம் ஆண்டு டெல்லியின் ஆளுநராக நியமிக்கப்பட்டார். ஷாஜஹானாபாத்தின் புதிய நகரத்தில் செங்கோட்டையைக் கட்டும் பொறுப்பு அவரிடம் ஒப்படைக்கப்பட்டது.

மும்தாஜ் மஹால் முதல்முறை அடக்கம் செய்யப்பட்ட இடம்

தாஜ்மஹால் 1560 களில் டெல்லியில் உள்ள ஹுமாயூனின் கல்லறையை மாதிரியாகக் கொண்டு கட்டப்பட்டது. இதற்காக 42 ஏக்கர் நிலம் தேர்வு செய்யப்பட்டது. அதன் நான்கு மினாரட்டுகள் 139 அடி உயரம் வரை அமைக்கப்பட்டு மேலே ஒரு குவிமாடம் அமைக்கப்பட்டது.

மகரானாவிலிருந்து கொண்டு வரப்பட்ட சலவைக்கல்

தாஜ்மஹாலைக் கட்ட முடிவு செய்த பிறகு, ஷாஜகானின் முதல் சவால் இந்தக் கல்லறைக்கான இடத்தைத் தேர்ந்தெடுப்பது.

தாஜ்மஹால் பற்றிய புத்தகத்தை எழுதிய டயானா மற்றும் மைக்கேல் ப்ரெஸ்டன், "ஷாஜஹானின் முதல் நோக்கம் தாஜ்மஹால் இருக்கும் இடம் அமைதியாகவும் ஆக்ரா நகரத்திலிருந்து விலகியும் இருக்க வேண்டும் என்பதுதான். இரண்டாவது நோக்கம் தொலைவிலிருந்தும் பார்க்கக்கூடிய அளவுக்குப் பெரிதான கட்டடமாக இருக்க வேண்டும் என்பது. மூன்றாவது, அதன் தோட்டங்களுக்குத் தண்ணீர்த் தட்டுப்பாடு ஏற்படாத வகையில் யமுனை நதிக்கு அருகில் இருக்க வேண்டும் என்பது. தான் வாழும் ஆக்ரா கோட்டையிலிருந்து தாஜ்மஹால் தெரியும்படி இருக்க வேண்டும் என்று ஷாஜகான் விரும்பினார். எனவே, ஆக்ரா கோட்டையிலிருந்து ஒன்றரை மைல் தொலைவில் அதை உருவாக்கினார்."

தாஜ்மஹாலின் கட்டுமானப் பணி ஜனவரி 1632 இல் தொடங்கியது. அதுவரை ஷாஜகான் தெற்கில் இருந்தார்.

அப்போது இந்தியாவுக்கு வருகை தந்த பீட்டர் மண்டி, 'ஐரோப்பா மற்றும் ஆசியாவில் பீட்டர் மண்டியின் பயணங்கள்' என்ற தனது புத்தகத்தில், "முதலில் அந்த பகுதியை சுத்தம் செய்து நிலம் சமன் செய்யப்பட்டது. அதன் பிறகு ஆயிரக்கணக்கான தொழிலாளர்கள் இரவு பகலாக உழைத்தனர். கட்டடம் கட்டவும்.ஆழமான அடித்தளம் தோண்டப்பட்டது. அருகில் ஓடும் யமுனா நதியின் நீர் அதில் இறங்காமல் சிறப்பு கவனம் செலுத்தப்பட்டது. ஜூன் மற்றும் செப்டம்பர் மாதங்களில் யமுனை நதியின் வெள்ளம் தாஜ்மஹாலை சேதப்படுத்தாமல் இருப்பதும் உறுதி செய்யப்பட்டது. முதல் 970 அடி நீளம் மேலும் 364 அடி அகல மேடை கட்டப்பட்டு அதன் மீது கல்லறை கட்டப்பட்டது." என்று குறிப்பிட்டுள்ளார்.

'உலகின் முதல் கோயில்': மனித வரலாற்றை மாற்றி எழுதும் 11,000 ஆண்டுகளுக்கு முந்தைய கட்டுமானம்

பழங்கால தமிழர்கள் கோயில் கோபுர கலசங்களில் தானியம் வைத்தது ஏன்?

கட்டடத்தில் பயன்படுத்தப்பட்ட பளிங்கு 200 மைல் தொலைவில் உள்ள மக்ரானாவில் இருந்து கொண்டு வரப்பட்டது. ஒரு போர்த்துகீசியப் பயணி சிபாஸ்டியாவோ மென்ரிக், "தாஜ்மஹாலில் பயன்படுத்தப்பட்ட சில பளிங்குத் துண்டுகள் மிகப் பெரியவை, அவை காளைகள் மற்றும் நீண்ட கொம்புகள் கொண்ட எருமைகள் மூலம் ஆக்ராவிற்கு கொண்டு செல்லப்பட்டன. அவை பிரத்யேகமாகத் தயாரிக்கப்பட்ட மாட்டு வண்டிகளில் கொண்டு வரப்பட்டன. இருபத்தைந்து முதல் முப்பது மாடுகள் அந்த வண்டியை இழுத்து வந்தன" என்று குறிப்பிட்டுள்ளார்.

தொழிலாளர்களின் கைகள் வெட்டப்பட்ட கதை புரளி

தாஜ்மஹாலைப் பற்றிய 'தாஜ் மஹால் - பேஷன் அண்ட் ஜீனியஸ் அட் தி ஹார்ட் ஆஃப் த முகல் எம்பயர்' என்ற புத்தகத்தின் ஆசிரியர்களான டயானா மற்றும் மைக்கேல் பிரஸ்டன், "தாஜ்மஹாலைக் கட்டுவதற்கு மூங்கில் மற்றும் மரக் கட்டைகள் மற்றும் செங்கற்களால் ஒரு சாரக்கட்டு செய்யப்பட்டது. வேலை முடிந்தது, எனவே ஷாஜஹானிடம் செங்கற்களின் சாரக்கட்டை இடிக்க ஐந்து வருடங்கள் ஆகும் என்று கூறப்பட்டது. இதையடுத்து கீழே இறக்கப்படும் அனைத்து செங்கற்களும் அந்தத் தொழிலாளர்களுடையது என்று ஷாஜஹான் உத்தரவிட்டார்."

"இதன் விளைவு, ஒரே இரவில் சாரக்கட்டு இடிக்கப்பட்டது. தாஜ்மஹால் முழுமையாகக் கட்டப்படுவதற்கு முன்பே அதை வெளியாட்களின் கண்களில் இருந்து பாதுகாக்க அந்த சாரக்கட்டு கட்டப்பட்டது என்பது ஒரு கட்டுக்கதை. ஒரு மனிதன் தாஜ்மஹாலை ஒருமுறை சுவருக்கு வெளியிலிருந்து பார்த்ததால் அவரது கண் பறிக்கப்பட்டது என்ற கதையும் கட்டுக்கதை தான்" என்று அந்தப் புத்தகம் குறிப்பிடுகிறது.

வரலாற்றுத்தொடர் 08: 'மாயன் நாள்காட்டி': உலகம் அழியும் என்று கணித்தது உண்மையா?

வரலாற்றுத்தொடர் 07: மத்திய அமெரிக்காவை ஆட்டிப்படைத்த ஆஸ்டெக் பேரரசைதெரியுமா?

வரலாற்றுத்தொடர் 06: ரஷ்யாவின் கடைசி ஜார் மன்னரின் குடும்பம் சுட்டுக் கொல்லப்பட்ட ரத்த வரலாறு

வரலாற்றுத்தொடர் 05: பழங்கால மெசபடோமிய நகரான பாபிலோன் வரலாறு

இந்த உலக அதிசயத்தை மீண்டும் உருவாக்க முடியாதபடி தாஜ்மஹாலைக் கட்டிய ஒவ்வொரு தொழிலாளியின் கைகளையும் ஷாஜஹான் வெட்டிய கதையை இங்குள்ள ஒவ்வொரு சுற்றுலா வழிகாட்டியும் சொல்கிறார்கள். ஆனால் இந்தச் சம்பவத்திற்கு எந்த ஆதாரமும் இல்லை, எந்த வரலாற்றாசிரியரும் குறிப்பிடவில்லை.

ஷாஜகானின் வாழ்க்கை வரலாற்றை 'ஷாஜஹான் - த ரைஸ் அண்ட் ஃபால் ஆஃப் த முகல் எம்பயர்" என்ற புத்தகமாக எழுதிய ஃபர்குஸ் நிக்கோல், "தாஜ்மஹாலைக் கட்டிய பெரும்பாலான தொழிலாளர்கள் கன்னோஜில் இருந்து வந்த இந்துக்கள். மலர்களைப் பராமரிப்பவர்கள் போகாராவிலிருந்து அழைக்கப்பட்டனர். காஷ்மீரின் ராம் லாலிடம் தோட்டத்தை உருவாக்கும் ஒப்படைக்கப்பட்டது," என்று குறிப்பிடுகிறார்.

மேலும் தாஜ்மஹாலில் குர்ஆன் வசனங்களை செதுக்கும் பொறுப்பு அமானத் கானுக்கு வழங்கப்பட்டது. தாஜ்மஹாலில் தனது பெயரை எழுத ஷாஜகான் அனுமதித்த ஒரே நபர் இவர்தான்.

குர்ஆன் வசனங்களைத் தவிர, தாஜ்மஹாலில் உள்ள மலர் வேலைப்பாடுகள் மிகவும் கவர்ச்சியாக இருந்தன, இரண்டு நூற்றாண்டுகளுக்குப் பிறகு, ரஷ்ய எழுத்தாளர் ஹெலினா பிளாவட்ஸ்கி எழுதினார், "தாஜ்மஹாலின் சுவர்களில் உள்ள சில பூக்கள் மிகவும் தத்ரூபமாக இருந்தன. அவற்றைத் தொட, கைகள் தானாக நீளும்," என்று குறிப்பிடுகிறார்.

சுவற்றில் புதைக்கப்பட்ட விலைமதிப்பில்லாத ரத்தினங்கள்

தாஜ்மஹாலின் கட்டடத்தில் ஆசியாவின் பல்வேறு பகுதிகளிலிருந்து ஷாஜகான் ஆர்டர் செய்த 40 விதமான கற்கள் பதிக்கப்பட்டிருந்தன.

டயானா மற்றும் மைக்கேல் ப்ரெஸ்டன், "சீனாவின் காஷ்கரில் இருந்து பட்டுப் பாதையில் பச்சைக் கல் கொண்டு வரப்பட்டது. ஆப்கானிஸ்தானில் உள்ள சுரங்கங்களில் இருந்து நீலக் கல் இறக்குமதி செய்யப்பட்டது. அரேபியாவில் இருந்தும் செங்கடலிலிருந்தும் பவளமும் திபெத்திலிருந்து டர்க்கைஸும் கொண்டு வரப்பட்டது. பர்மாவில் இருந்து மஞ்சள் அம்பர் மற்றும் இலங்கையில் இருந்து ரூபி கொண்டு வரப்பட்டது. லசுனியா கல் எகிப்தில் நைல் பள்ளத்தாக்கில் இருந்து இறக்குமதி செய்யப்பட்டது. சபையர் அசுபமாக கருதப்பட்டது, எனவே அவை அரிதாகவே பயன்படுத்தப்பட்டன" என்று குறிப்பிடுகிறார்கள்.

தாஜ் மஹால் உருவாக்க நான்கு கோடி ரூபாய் செலவு

ஷாஜஹான் கால வரலாற்றாசிரியர் அப்துல் ஹமீத் லஹோரி, தாஜ்மஹால் கட்டுவதற்கான செலவு அப்போதைய மதிப்பில் 50 லட்சம் ரூபாய் என்று குறிப்பிட்டுள்ளார். ஆனால் மற்ற வரலாற்றாசிரியர்கள் இந்த விலை தொழிலாளர்களுக்கு வழங்கப்படும் ஊதியம் மட்டுமே என்றும் கட்டடத்தில் பயன்படுத்தப்படும் பொருட்களின் மதிப்பு இதில் அடங்காது என்றும் நம்புகிறார்கள்.

பின்னர் கிடைத்த ஆவணங்களின் அடிப்படையில், சில வரலாற்று ஆய்வாளர்கள் தாஜ்மஹால் கட்டுவதற்கான செலவை அப்போதைய மதிப்பில் 4 கோடி ரூபாய் என மதிப்பிட்டுள்ளனர். கட்டடம் கட்டுவதற்கான அனைத்து பணமும் அரசு கருவூலம் மற்றும் ஆக்ரா மாகாண கருவூலத்தில் இருந்து கொடுக்கப்பட்டது. இனிவரும் காலங்களில் தாஜ்மஹால் பராமரிப்புக்காக, முப்பது சுற்றுவட்டார கிராமங்களில் இருந்து வரும் வருவாயை இப்பணிக்கு பயன்படுத்த வேண்டும் என்று ஷாஜகான் உத்தரவிட்டிருந்தார்.

மும்தாஜ் மஹால் அடக்கம் செய்யப்பட்ட இடத்துக்கு அருகில் ஷாஜஹானும் அடக்கம்

1659இல் ஷாஜகானின் மகன் ஔரங்கசீப் தனது தந்தையைச் சிறையில் அடைத்தபோது, சில நாட்களுக்குப் பிறகு அவர் நோய்வாய்ப்பட்டார். தனக்கு இன்னும் அதிக நேரம் இல்லை என்று அவர் உணர்ந்தபோது, தாஜ்மஹாலை எப்போதும் பார்க்கக்கூடிய பால்கனியில் வைக்க வேண்டும் என்று அவர் தனது விருப்பத்தை வெளிப்படுத்தினார்.

அதே பால்கனியில், காஷ்மீரி சால்வை போர்த்தப்பட்ட ஷாஜகான், 1666 ஜனவரி 21 அன்று இந்த உலகிலிருந்து விடைபெற்றார். அப்போது அவரது மகள் ஜஹான் ஆரா உடன் இருந்தார். சந்தன மரத்தால் செய்யப்பட்ட சவப்பெட்டியில் அவரது உடல் கிடத்தப்பட்டது.

அவரது மகள் இறுதிச் சடங்குகளை அரசு முறையில் செய்ய வேண்டும் என்று விரும்பினார், ஆனால் ஔரங்கசீப் அவரது விருப்பத்தை மதிக்கவில்லை. அவர் தாஜ்மஹாலில் அவரது மனைவி மும்தாஜ் மஹாலுக்கு அருகில் குர்ஆன் வசனங்களை ஓதப்பட, அடக்கம் செய்யப்பட்டார்.

ஷாஜஹான் மற்றும் மும்தாஜின் சமாதிகள்

ஆங்கிலேயர் காலத்தில் மதிப்பிழந்த தாஜ்மஹால்

முகலாயர்களின் வீழ்ச்சிக்குப் பிறகு, 1803 இல், பிரிட்டிஷ் ஜெனரல் லேக் ஆக்ராவை ஆக்கிரமித்தார். இதன் பிறகு, தாஜ்மஹாலின் சுவர்களில் பதிக்கப்பட்டிருந்த மதிப்புமிக்க கற்கள், தரைவிரிப்புகள், சுவர் தொங்கும் பொருட்கள் மறையத் தொடங்கின.

ஆங்கிலேயர்கள் தாஜ்மஹாலின் உள்ளே அமைந்துள்ள மசூதியை வாடகைக்கு விட்டு அதைச் சுற்றி தேனிலவுக் குடில்களைக் கட்டினார்கள். கல்லறையின் மேடையில் இராணுவ இசைக் குழுக்கள் இசைக்கத் தொடங்கின, தாஜ்மஹால் தோட்டத்தில் பிக்னிக் பார்ட்டிகள் தொடங்கின.

இந்த நேரத்தில், 1830 ஆம் ஆண்டில், பிரிட்டிஷ் கவர்னர் ஜெனரல் வில்லியம் பென்டிங்க் தாஜ்மஹாலை இடித்து அதன் பளிங்குகளை ஏலம் விட நினைத்தார் என்றும் வதந்தி பரவியது.

1857ஆம் ஆண்டு கிளர்ச்சியின் போது, பிரிட்டிஷ் வீரர்கள் சில முகலாயக் கட்டடங்களைச் சேதப்படுத்தினர். அவற்றில் ஒன்று மும்தாஜ் மஹாலின் தந்தை ஆசஃப் கானின் அரண்மனை. ஆனால் தாஜ்மஹால் எப்படியோ பாதுகாப்பாக இருந்தது. இருபதாம் நூற்றாண்டின் முற்பகுதியில், பிரிட்டிஷ் வைஸ்ராய் கர்சன் பிரபு தாஜ்மஹாலைப் புதுப்பிப்பதில் மிகுந்த ஆர்வம் காட்டினார்.

1965ஆம் ஆண்டு நடந்த இந்திய-பாகிஸ்தான் போரின் போது, அருகிலுள்ள விமானப்படை தளத்தின் மீது பாகிஸ்தான் வான்வழித் தாக்குதலை எதிர்பார்த்து, இந்திய அரசாங்கம் தாஜ்மஹாலை இரவில் மேலே இருந்து பார்க்க முடியாதபடி ஒரு பெரிய கருப்பு துணியை தைத்துப் போட்டது. இந்தத் துணி 1995ஆம் ஆண்டு வரை பாதுகாப்பாக இருந்தது. ஆனால் எலிகள் அதைக் கடித்துக் குதறிவிட்டன..

கேரளாவை உலுக்கிய கூடத்தாய் கொலை

கேரளாவை உலுக்கிய ஒரே குடும்பத்தின் 6 பேர் கொலைச் சம்பவம்: 14 ஆண்டுகளில் ஒரே மாதிரி 6 மர்மச் சாவுகள்: பிடிபட்டார் சயனைடு கொலைகாரி

                         ஜோளி 

10/10/2019 கேரள மாநிலம் கோழிக்கோடு மாவட்டத்தில் உள்ள கூடத்தாயில் 14 ஆண்டுகள் காலக்கட்டத்தில் ஒரே குடும்பத்தைச் சேர்ந்த 6 பேரை சொத்துக்காக விஷம் வைத்துக் கொல்லப்பட்டது தெரியவந்துள்ளது. கேரளாவை உலுக்கிய இந்த மர்மக்கொலைகள் சம்பவத்தில் போலீஸார் தீவிர விசாரணைக்குப் பிறகு பெண் உட்பட 3 பேரைக் கைது செய்துள்ளனர்.

     அன்னம்மா தாமஸ் (57) 

கணவரின் தாய் அன்னம்மா தாமஸ் முதல் கொலை 22-08-2002 ஆட்டு சூப்பில் சய்னைடு கலந்து கொடுத்தது.

2002 முதல் 2016 வரை சொத்துக்காக குடும்பத்தினர் ஒவ்வொருவரையாக திட்டம்போட்டு கொலை செய்தது மற்ற உறவினர்களிடையே அதிர்ச்சியை ஏற்படுத்தியது. சொத்துக்காக இப்படி ஒரு சதியா என்று போலீஸாரும் கேரள மக்களுமே அதிர்ச்சியில் உறைந்த சம்பவமாகும் இது.

          டாம் தாமஸ் (66)

கணவரின் தந்தை டாம் தாமஸ் இரண்டாவது கொலை 22-08-2008 மரச்சீனி கிழங்கில் சய்னைடு கலந்து கொடுத்தது.

இதில் கைது செய்யப்பட்ட 3 பேர்களில் 2 பேர் கொல்லப்பட்டவர்களின் நெருங்கிய உறவினர்கள் ஆவார்கள். 14 ஆண்டுகள் ஒரே மாதிரி கொல்லப்பட்ட சம்பவத்தில் பொன்னமட்டோம் குடும்பத்தத் தலைவரும் கல்வித்துறை அதிகாரியுமான டாம் தாமஸ் (66), இவர் மனைவி அன்னம்மா தாமஸ் (57), மகன் ராய் தாமஸ் (40), டாம் தாமஸ் சகோதரரின் மருமகள் சிலி ஷாஜு, இவரது 2 வயது மகள் அல்பைன், அன்னம்மா தாமஸின் சகோதரர் மேத்யூ மஞ்சாடியில் (68) ஆகியோர் 2002 முதல் 2016 ஆண்டுகளுக்கு இடையே மர்மமான முறையில் இறந்தனர்.

            றாய் தாமஸ் (40)

கணவர் றாய் தாமஸ் மூன்றாவது கொலை 30-09-2011 சாப்பாட்டில் சய்னைடு கலந்து கொடுத்தது. 

ராய் தாமஸை திருமணம் செய்து கொண்ட ஜோளி தாமஸ், றாய் தாமஸ் மர்மச்சாவுக்குப் பிறகு ஷாஜு சக்கரியா என்பவரைத் திருமணம் செய்து கொண்டார், சிலி என்பவர் இறந்ததையடுத்து சக்கரியாவின் மகன் ஷாஜு என்பவரை ஜோளி திருமணம் செய்து கொண்டார். இந்நிலையில் ஜோளி தாமஸ் போலி உயில் தயார் செய்து குடும்பத்தின் பாதி சொத்துகளை தன் பெயருக்கு ஜோளி தாமஸ் மாற்றியதில் சந்தேகம் எழுந்தது.

இந்நிலையில்தான் சனிக்கிழமையன்று ஜோளி தாமஸ், உறவினர் எம்.எஸ். ஷாஜி (மேத்யூ) இவரது நண்பர் பிரஜு குமார் ஆகியோரை போலீஸார் கைது செய்தனர்.

       மாத்தியூ மஞ்சாடி (68)

கணவரின் தாய் மாமா மாத்தியூ மஞ்சாடியில் நான்காவது கொலை 24-02-2014 சய்னைடு கலந்து கொடுத்து கொலை. 

ராய் தாமஸ் மனைவியான ஜோளி தாமஸ் போலீஸாரிடம் வாக்குமூலம் அளிக்கையில் குடும்பத்தினர் அனைவரையும் விஷம் வைத்துக் கொன்றதாக ஒப்புக் கொண்டு அதிர்ச்சியளித்துள்ளார். மேலும் ராய் சகோதரி ராஞ்சுவையும் கொல்ல முயன்றதாகவும் தெரிவித்தார்.

சயனைடு கொலைகாரி ஜோளி தாமஸ், ராய் தாமஸ் என்பவரை 1998ம் ஆண்டு திருமணம் செய்து கொண்டார். இவர் பி.காம் பட்டதாரி, அழகு நிலையம் ஒன்றையும் கல்வி நிலையம் ஒன்றையும் நடத்தி வந்தார்.

ஜோளி தாமஸ், ஷாஜி மற்றும் பிரஜு குமாரிடமிருந்து சயனைடு வாங்கி கொலைகளைச் செய்ததாக போலீஸ் விசாரணையில் தெரியவந்தது. ஷாஜி முன்னதகா ஜுவெல்லரியில் வேலைப்பார்த்தவர் அங்கு நகைகள் பாலிஷ் செய்ய பயன்படுத்தப்படும் சயனைடை ஜோளிக்கு இவர்தான் கொடுத்துள்ளார். இந்த சயனைடு விஷத்திற்கு இரையான அன்னம்மா தாமஸின் சகோதரர் மேத்யூ மஞ்சடியிலின் உறவினர்தான் ஷாஜி.

      அல்பைன் ஷாஜு (2)

அல்பைன் ஷாஜு ஐந்தாவது கொலை 03-05-2014 பிரட்டில் சய்னைடு கலந்து கொடுத்து கொலை. 

இதற்கு முன்பாக 6 சுற்று விசாரணையில் கொலைகளுக்கும் தனக்கும் சம்பந்தமில்லை என்று கல்லூளி மங்குனியாக நின்ற ஜோளி தாமஸ் என்ற அந்தப் பெண் கடைசியில் போலீஸார் ஆதாரங்களுடன் வந்த போது வேறு வழியின்றி உண்மையை ஒப்புக் கொண்டார். அதோடு தனக்கு உதவியர்களையும் போட்டுக் கொடுத்தார்.

           சிலி ஷாஜு (41)

சிலி ஷாஜு ஆறாவது கொலை 11-01-2016 ஜுஸில் சய்னைடு கலந்து கொடுத்து கொலை.

இவர் சிக்கக் காரணமாக அமைந்தது இரண்டு விஷயங்கள் தான் என்கிறார் விசாரணை போலீஸ் அதிகாரி கே.ஜி. சைமன், ஒன்று தான் தேசிய தொழில்நுட்ப கழகத்தில் பணியாற்றுவதாக ஜோளி தாமஸ் பொய் கூறியுள்ளார், இரண்டாவதாக குடும்பச் சொத்துக்களை அபகரிக்க போலி ஆவணங்களைத் தயாரித்துள்ளார்.

முக்கியமாக ஜோளி வலைக்குள் சிக்க காரணமானவர் அமெரிக்காவில் இருக்கும் கணவரின் தம்பி ரோஜோ தாமஸ் கொடுத்த புகாரின் அடிப்படையில் தான்.

மாயமான டைரி : 

டாம் தாமஸும், அன்னம்மா தாமஸும் ஓய்வு பெற்ற அரசு ஊழியர்கள். இவர்களுக்கு ரெகுலராக டைரி எழுதும் பழக்கம் இருந்தது. இவர்களது டைரியும் மாயமாகியுள்ளது, அது கிடைத்தால் இன்னும் கூடுதல் தகவல்கள் கிடைக்கும் என்று போலீஸார் கருதுகின்றனர்.

                           ஜோளி 

இவர்களது மகன் ராய் தாமஸ் முக்கம் மற்றும் தாமரசெரியில் பல தொழில்களைச் செய்து வந்தார், ஆனால் இவை எதுவும் வெற்றியடையவில்லை. அன்னம்மா தான் தன் மகன் வர்த்தகத்துக்குப் பணம் அளித்து வந்ததாக நம்பப்பட்டது ஏனெனில் டாம் தாமஸ் இறந்த போது வங்கிக் கணக்கில் ரூ.22,000 மட்டும்தான் இருந்தது. இருவரும் அரசு ஊழியர்கள் பென்ஷன்களை சேர்த்தாலே இன்னும் அதிகமான தொகையல்லவா வங்கியில் இருந்திருக்க வேண்டும் இவ்வளவு குறைந்த பணம் இருந்துள்ளதே என்ற சந்தேகமும் போலீஸாருக்கு எழுந்தது.

இரண்டாவது கணவர்  ஷாஜு

அன்னம்மா சகோதரர் மேத்யூ சாவு ஏற்படுத்திய புதிர்:

இதற்கிடையே அன்னம்மா தாமஸின் சகோதரர் 68 வயதான மேத்யூ மஞ்சடையில் மரணம் அடைந்தது போலீஸாருக்கு புரியாத புதிராக அமைந்தது.

இந்தக் குடும்பத்தின் முதல் மரணம் அன்னம்மா தான், ஆகஸ்ட் 22, 2002-ல் மட்டன் சூப்பை ருசித்த இவர் மரணமடைந்தார். வாயில் நுரை தள்ள அவர் இறந்த நிலையில்தான் மருத்துவமனைக்கே கொண்டு வரப்பட்டார். பிறகு 2008-ல் அன்னம்மா கணவர் டாம், 2011-ல் மகன் ராய் தாமஸ் ஆகியோர் இதே பாணியில் மரணமடைந்தது பீதியை ஏற்படுத்தியது.

    அன்னம்மாவும், ஜோளியும் 

3 மரணங்களும் ஒரேமாதிரி இருந்ததை மேத்யூதான் முதன் முதலில் கூறினார், எனவே மேத்யூவுக்கு ஜோளி மீது சந்தேகம் விழுந்தது. ராய் மரணத்தில் சந்தேகம் எழுந்ததால் மேத்யூ தான் பிரேதப் பரிசோதனை செய்ய வேண்டும் என்ற கோரிக்கையை வைத்தார்.அப்போதுதான் சயனைடு கலப்பு விவகாரம் வெளியே வந்தது.

ஆனால் ராய் தாமஸின் பெற்றோர் அன்னம்மா, டாம் ஆகியோரது மரணங்கள் சந்தேகப்படாததால் அவர்கள் சாவில் மர்மம் இருப்பதாக அப்போது தெரியவில்லை. 

          பிரஜு குமார், ஜோளி

2011-ல் ராய் தாமஸ் மர்ம மரணத்தையடுத்து மேத்யூ என்பவரும் மரணமடைந்தார். இவரும் திடீரென மயங்கிச் சரிந்து இறந்தார். சம்பவ தினத்தன்று மேத்யூ வீட்டில் தனியாக இருந்துள்ளார். அப்போது இவர் திடீரென மயங்கிச் சரிந்ததாக ஜோளி தான் அக்கம்பக்கத்தினரை அழைத்துள்ளார். வாயில் நுரை தள்ள மேத்யூ மரணமடைந்ததும் சந்தேகத்தை ஜோளி மீது அதிகரித்தது, ஏனெனில் ஜோளி வீடும் மேத்யூ வீடும் அருகருகில் தான் இருந்துள்ளது.

அல்பைன் மற்றும் சிலி மரணங்கள்: 

           ஜோளியும், சிலியும்

டாம் சகோதரர் சக்கரியாவின் மகன் ஷாஜு, இவர் சிலி என்பவரை திருமணம் செய்து கொண்டார். இருவருக்கும் 2 வயது மகள் அல்பைன் ஷாஜு இருந்தார். இந்நிலையில் 2014 மே 3ம் தேதி குழந்தை அல்பைன் ஷாஜு பிரெட் மட்டன் கறியைச் சாப்பிட்டு இதே போல் திடீரென மயங்கிச் சரிய மருத்துவமனைக்குக் கொண்டு செல்லப்பட்டு 3 நாட்களுக்குப் பிறகு சிகிச்சை பலனின்றி இறந்தது குழந்தை. இந்தச் சம்பவத்தின் போதும் ஜோளி அருகில் இருந்ததையும் போலீஸார் குறித்துக்கொண்டனர். 

 கணவர் றாய் தாமஸ், பிள்ளைககளுடன் ஜோளி        குழந்தையின் தாய் சிலி 2016ம் ஆண்டு இதே போல் மர்ம மரணமடைந்தார். தாமரசேரியில் இவர் ஜோளியுடன் திருமண நிகழ்ச்சி ஒன்றிற்க்குச் சென்றுள்ளார். பிறகு பல் மருத்துவரை சிலியும் கணவர் ஷாஜுவும் சென்று பார்த்துள்ளனர். ஜோளியும் உடனிருந்தார்.

சிலியின் கணவர் ஷாஜு முதலில் பல் மருத்துவர் அறைக்குள் செல்ல ஜோலி, சிலி வெளியே அமர்ந்திருந்தனர். அப்போது சிலி திடீரென வாயில் நுரை தள்ள ஜோளியின் மடியில் சாய்ந்துள்ளார். சிலியையும் காப்பாற்ற முடியவில்லை. சிலி இறந்து ஓராண்டுக்குப் பிறகு குடும்பத்தினரின் கடும் எதிர்ப்பையும் மீறி சிலியின் கணவர் ஷாஜுவும் ஜோளியும் திருமணம் செய்து கொண்டனர். இது நடந்தது பிப்ரவரி 6, 2017.இந்தத் திருமணமும் பெரிய சந்தேகத்தை ஏற்படுத்தியது.திட்டம்போட்டு சொத்துக்காக குடும்பத்தினரை ஒவ்வொருவராக ஜோளி தாமஸ் கொலை செய்து மிகப்பெரிய சயனைடு கொலைகாரியாக மாறியிருப்பதும், இவரது வாக்குமூலமும் குடும்பத்தினரை கடும் அதிர்ச்சியிலும் சோகத்திலும் ஆழ்த்தியுள்ளது.